ВІЗІТ У ЗША. ГЕНАСАМБЛЕЯ ААН
21–24 верасня Святлана Ціханоўская знаходзілася ў Нью-Ёрку, дзе на палях Тыдня высокага ўзроўню 81-й сесіі Генеральнай Асамблеі ААН правяла шэраг сустрэчаў і прыняла ўдзел у міжнародных мерапрыемствах.
21 верасня на палях Генасамблеі ААН прайшоў сайд-івэнт «Беларусь: саўдзельнік вайны Расіі супраць Украіны і пагроза міжнароднай бяспецы». Сустрэчу арганізавалі Латвія і Еўрапейскі Саюз пры садзейнічанні Офіса Святланы Ціханоўскай і з удзелам прадстаўнікоў Украіны, Літвы, Эстоніі, Ірландыі, Швецыі і Чэхіі. У цэнтры ўвагі былі сітуацыя ў Беларусі, удзел рэжыму Лукашэнкі ў расійскай вайне супраць Украіны і наступствы для рэгіянальнай і міжнароднай бяспекі.
Падчас візіту Святлана Ціханоўская сустрэлася з сенатаркай ЗША Джын Шахін, прэзідэнтам Румыніі Нікушорам Данам, прэм’ер-міністрам Славеніі Янезам Яншам, былым дзяржсакратаром ЗША Майкам Пампеа і 42-м прэзідэнтам ЗША Білам Клінтанам. На сустрэчах з міністаркай замежных справаў Фінляндыі Элінай Валтонен і палітычным дзяржаўным сакратаром МЗС Пасі Раялам абмяркоўвалася дапамога беларусам, якія пацярпелі ад рэпрэсій. Па выніках сустрэчаў Фінляндыя абвясціла пра дадатковыя 100 тысяч еўра на дапамогу палітвязням, вызваленым і іх сем’ям.
У межах Clinton Global Initiative Святлана Ціханоўская выступіла ў дыскусіі, прысвечанай бяспецы Еўропы, падтрымцы Украіны і салідарнасці дэмакратычных краінаў. Таксама яна ўзяла ўдзел у Atlantic Council Global Citizen Awards, дзе правяла размовы з палітычнымі і бізнес-лідарамі, у тым ліку прэзідэнтам Чэхіі Петрам Паўлам, прадстаўнікамі Atlantic Council, Мюнхенскай канферэнцыі па бяспецы, Сусветнага эканамічнага форуму і Google.
БЕЛАРУС ЛЕЎ МІХЕЕЎ ВЫЗВАЛЕНЫ Ў АРМЕНІІ
Беларус Леў Міхееў, якога пасля высылкі з Грузіі затрымалі на армянскай мяжы праз міждзяржаўны вышук па запыце беларускіх уладаў, вызвалены. Да вырашэння сітуацыі далучыліся беларускія праваабаронцы ў Грузіі і Арменіі, прадстаўнікі армянскага і грузінскага бакоў, а таксама юрысты Офіса Святланы Ціханоўскай.
БЕЛАРУСЫ ЗМОГУЦЬ ПАДАВАЦЬ ДАКУМЕНТЫ НА ВНЖ ЛІТВЫ Ў АРМЕНІІ І ГРУЗІІ
З 1 лістапада грамадзяне Беларусі змогуць падаваць заявы на часовы ВНЖ Літвы праз падраздзяленні знешняга пастаўшчыка паслуг у Арменіі і Грузіі. Офіс Святланы Ціханоўскай уздымаў пытанне даступных і бяспечных міграцыйных працэдураў для беларусаў у гэтых краінах у дыялогу з літоўскімі партнёрамі.
СУСТРЭЧА ОФІСА З БЕЛАРУСКІМІ ПРАВААБАРОНЦАМІ
Дарадца Святланы Ціханоўскай па прававых пытаннях Леанід Марозаў сустрэўся з прадстаўнікамі беларускіх праваабарончых арганізацый у Вільні. Абмеркавалі сітуацыю з палітвязнямі і рэпрэсіямі, дакументаванне злачынстваў, міжнародныя механізмы адказнасці, транснацыянальныя рэпрэсіі і злоўжыванне механізмамі Інтэрпола, а таксама прававыя праблемы беларусаў за мяжой.
ПРАВАВЫЯ ПРАБЛЕМЫ БЕЛАРУСАЎ У ІТАЛІІ
У калегіі адвакатаў Фларэнцыі прайшла рабочая сустрэча, прысвечаная прававым праблемам беларусаў у Італіі. У ёй узялі ўдзел дарадца Святланы Ціханоўскай Леанід Марозаў, прадстаўніца беларускай супольнасці Юлія Юхно і праваабаронца «Вясны» Уладзімір Лабковіч. Асноўнымі тэмамі сталі пратэрмінаваныя беларускія пашпарты, міжнародная абарона, легалізацыя, транснацыянальныя рэпрэсіі і рызыкі вяртання ў Беларусь. Бакі дамовіліся развіваць супрацоўніцтва паміж беларускай і італьянскай юрыдычнымі супольнасцямі.
ІІІ АКАДЭМІЯ ЖАНОЧАГА ПАЛІТЫЧНАГА ЛІДАРСТВА
Падведзены вынік ІІІ Акадэміі жаночага палітычнага лідарства, якая прайшла 13–18 верасня ў Празе. Праграма была накіраваная на падрыхтоўку жанчын з палітычным досведам да больш актыўнага ўдзелу ў грамадскіх працэсах і прадстаўлення беларускай дэмакратычнай супольнасці на нацыянальным і міжнародным узроўнях.
УЗНАГАРОДЖАННЕ ДАНЧЫКА МЕДАЛЁМ ФРАНЦЫСКА СКАРЫНЫ
У Нью-Ёрку Святлана Ціханоўская ўзнагародзіла беларускага спевака і журналіста Данчыка (Багдана Андрусішына) медалём Францыска Скарыны — за шматгадовы ўнёсак у развіццё беларускай культуры, мовы і свабоды слова. «Данчык сваёй музыкай заразіў Беларуссю тысячы людзей. Для многіх менавіта праз яго песні беларуская мова стала бліжэйшай, а беларуская культура — сваёй», — адзначыла Святлана Ціханоўская.
АГЛЯД ПАДЗЕЯЎ У СФЕРЫ АДУКАЦЫІ І НАВУКІ
Апублікаваны агляд падзей у сферы адукацыі і навукі за жнівень 2026 года. Сярод ключавых тэмаў — пераслед прадстаўнікоў акадэмічнай супольнасці, сітуацыя вакол Еўрапейскага гуманітарнага ўніверсітэта і іншыя падзеі, якія ўплываюць на беларускую адукацыю і навуку.
МЕДЫЯ
AFP (Міжнароднае), Радыё Свабода (Беларусь), Укрінфарм (Украіна), Голас Амерыкі (Міжнароднае), BBC Newsday (Міжнароднае), Deutsche Welle (Міжнароднае), Origo (Венгрыя), «Обычный вечер» (Беларусь).
