Сустрэча адбылася ў Дубліне падчас саміту Еўрапейскай палітычнай супольнасці.
Адной з галоўных тэмаў стаў працяг брытанскай палітыкі ў дачыненні да Беларусі. Бакі дамовіліся працягваць супрацоўніцтва і каардынаваць палітыку Вялікабрытаніі з еўрапейскімі партнёрамі.
Ціханоўская ўзняла пытанні вызвалення і падтрымкі палітзняволеных, дапамогі незалежным медыям і грамадзянскай супольнасці, а таксама прыцягнення рэжыму Лукашэнкі да адказнасці за злачынствы, у тым ліку за выкраданне ўкраінскіх дзяцей.
Таксама абмеркавалі падтрымку Украіны, ролю дэмакратычнай Беларусі ў еўрапейскай бяспецы, залежнасць рэжыму Лукашэнкі ад Расіі і працяг рэпрэсій. Асобную ўвагу надалі захаванню міжнароднага ціску на рэжым, сінхранізацыі санкцыйнай палітыкі Вялікабрытаніі і Еўрасаюза, а таксама неабходнасці ўздымаць беларускае пытанне на міжнародных пляцоўках, у тым ліку ў межах G7 і G20.
Бакі таксама абмеркавалі развіццё стратэгічных кансультацый паміж Вялікабрытаніяй і беларускімі дэмакратычнымі сіламі.
