Хто такая Святлана Ціханоўская?
Святлана Ціханоўская – нацыянальная лідарка Беларусі, кіраўнік Аб’яднанага Пераходнага Кабінета Беларусі. Яна стала сімвалам мірнага супраціву і нацыянальнай еднасці, прадстаўніцай беларускага народа ў кантэксце выбараў прэзідэнта Беларусі ў 2020 годзе і наступных падзей. Паводле даследавання платформы “Голас” на прэзідэнцкіх выбарах 2020 года за Святлану Ціханоўскую прагаласавала не менш за тры мільёны чалавек ці 56% выбаршчыкаў з улікам рэальнай яўкі.
З моманту прэзідэнцкіх выбараў 2020 года Святлана Ціханоўская набыла вялікі палітычны вопыт, паспеўшы сустрэцца з вялікай колькасцю дзяржаўных дзеячаў сусветнага ўзроўню, тым самым прыцягваючы ўвагу міжнароднай палітыкі да Беларусі і барацьбы беларускага народа за дэмакратыю.
Святлана Ціханоўская была ўдастоена многіх міжнародных узнагарод, у тым ліку амерыканскай прэміі Свабоды імя Джона МакКейна і прэміі “За свабоду думкі” імя Сахарава, якую ўручае Еўрапарламент.
