Аб’яднаны Пераходны Кабінет Беларусі (далей Кабінет) – пастаянны выканаўчы орган, створаны абранай Нацыянальнай лідаркай Беларусі Святланай Ціханоўскай, які ва ўмовах палітычнага крызісу на калегіяльнай аснове распрацоўвае і забяспечвае прыняцце і выкананне палітычных рашэнняў, неабходных для захавання незалежнасці і суверэнітэту Рэспублікі Беларусь, пераадолення палітычнага крызісу ў Беларусі, абароны інтарэсаў, правоў і свабод яе грамадзянаў і забеспячэння пераходу да дэмакратычнага кіравання ў Беларусі.
Кабінет узаемадзейнічае з арганізаванымі структурамі дэмакратычных сілаў і грамадзянскай супольнасці Беларусі для каардынацыі сумесных намаганняў і вядзе сваю дзейнасць да моманту аднаўлення ў краіне канстытуцыйнай законнасці.
Мэты Кабінета
Абараніць незалежнасць і ўзмацніць суверэнітэт Рэспублікі Беларусь, прадстаўляць нацыянальныя інтарэсы Беларусі, дамагчыся дэакупацыі краіны.
Распрацаваць і рэалізаваць захады з мэтай спыніць незаконнае ўтрыманне ўлады рэжымам Лукашэнкі, забяспечыць транзіт улады ад дыктатуры да дэмакратыі, спрыяць правядзенню сумленных і свабодных выбараў.
Аднавіць канстытуцыйную законнасць і правапарадак.
Вызваліць і забяспечыць рэабілітацыю ўсіх асобаў, зняволеных рэжымам па палітычных матывах.
Распрацаваць і забяспечыць прыняцце і выкананне рашэнняў, неабходных для дасягнення дэмакратычных перамен у краіне.
Сферы кампетэнцыі Кабінета
Абарона незалежнасці, суверэнітэту і нацыянальных інтарэсаў Беларусі, прадстаўленне Рэспублікі Беларусь на міжнароднай арэне.
Распрацоўка, прыняцце і забеспячэнне выканання рашэнняў у сферы ваеннай палітыкі і нацыянальнай бяспекі.
Вызначэнне прыярытэтаў і інтарэсаў у знешняй палітыцы, развіццё адносінаў з замежнымі дзяржавамі, міжнароднымі ўніверсальнымі, спецыялізаванымі і рэгіянальнымі арганізацыямі, выпрацоўка прынцыпаў новай знешняй палітыкі Беларусі.
Распрацоўка і рэалізацыя мераў па забеспячэнні транзіту ўлады, спрыянне правядзенню сумленных і свабодных выбараў.
Распрацоўка, прыняцце і забеспячэнне выканання рашэнняў па абароне правоў і свабод беларускіх грамадзянаў унутры і за межамі краіны.
Распрацоўка, прыняцце і забеспячэнне выканання рашэнняў, накіраваных на развіццё ўстойлівых дэмакратычных інстытутаў з мэтай дасягнення і падтрымання сацыяльна-палітычнай і эканамічнай стабільнасці ў Беларусі, стабілізацыю сферы дзяржаўнага кіравання, забеспячэнне дабрабыту грамадзян Беларусі, развіццё нацыянальнай культуры, навукі, адукацыі, захаванне гістарычнай памяці, папулярызацыю беларускай мовы.
Распрацоўка, прыняцце і рэалізацыя іншых рашэнняў, неабходных для дасягнення пастаўленых мэтаў.
