5 ГОД АД ПАЧАТКУ ПРАТЭСТАЎ
Дэмакратычныя сілы рыхтуюцца да адзначэння 5-годдзя ад выбараў 2020 году. У гэты дзень мы заклікаем міжнародную супольнасць падтрымаць беларусаў у іх змаганні за свабоду. 9–10 жніўня ў Варшаве плануецца правядзенне вялікай канферэнцыі «Новая Беларусь», якая збярэ ўсе структуры дэмакратычных сілаў і грамадзянскай супольнасці. У межах канферэнцыі будуць прэзентаваныя змены ў Аб’яднаным пераходным кабінеце, стратэгічныя прыярытэты дэмакратычных сілаў, вынікі даследаванняў і новыя кампаніі. Рэгістрацыя магчымая па спасылцы.
9 жніўня ў Варшаве ў 15:00 адбудзецца Марш салідарнасці з удзелам Святланы і Сяргея Ціханоўскіх, Паўла Латушкі і іншых лідараў. Падобныя акцыі пройдуць у гарадах Еўропы і ЗША: паказы фільмаў, выставы, культурніцкія мерапрыемствы.
7–8 жніўня запланаваныя слуханні Каардынацыйнай рады з удзелам прадстаўнікоў Аб’яднанага пераходнага кабінета.
ВІЗІТ У БРУСЕЛЬ
Падчас візіту ў Брусель Святлана Ціханоўская выступіла на Парламенцкай Асамблеі НАТА, дзе заклікала падтрымаць Украіну, беларускую грамадзянскую супольнасць, і незалежныя медыя. Ціханоўская сустрэлася з прэзідэнтам Парламенцкай асамблеі НАТА Маркасам Перэстрэлу, з нацыянальнымі дэлегацыямі да Парламенцкай асамблеі НАТА. З Еўракамісаркай па пытаннях пашырэння і палітыкі добрасуседства Мартай Кос Ціханоўская запісала супольнае відэа. Еўракамісарка анансавала падрыхтоўку новага пакета падтрымкі для незалежных журналістаў, праваабаронцаў і грамадзянскай супольнасці.
СУСТРЭЧЫ Ў БЕЛЫМ ДОМЕ І ДЗЯРЖДЭПАРТАМЕНЦЕ
Дарадца Святланы Ціханоўскай па дыпламатычных пытаннях Дзяніс Кучынскі ў Вашынгтоне сустрэўся з намеснікам дарадцы прэзідэнта Дональда Трампа Эндзі Бэйкерам. Абмеркавалі беларуска-амерыканскія адносіны і крокі па вызваленні палітвязняў і працяг стратэгічнага дыялогу. Акрамя таго, Дзяніс Кучынскі правёў перамовы ў Дзяржаўным дэпартаменце, Кангрэсе ЗША і ўзяў удзел у Форуме па бяспецы ў Аспене.
ЯК ПРАЦУЕ ОФІС ПАСЛЯ ВЫЗВАЛЕННЯ СЯРГЕЯ ЦІХАНОЎСКАГА
Святлана Ціханоўская звярнулася да беларусаў і растлумачыла, што вызваленне Сяргея Ціханоўскага не прынесла рознагалоссяў унутры дэмакратычных сілаў і акрэсліла, што каманда Офіса працягвае працу па вызваленні ўсіх палітвязняў і вырашэнні палітычнага крызіса ў Беларусі. Паводле Святланы, Сяргей Ціханоўскі можа мець сваё меркаванне, і хутчэй за ўсё будзе займацца медыйна-інфармацыйнай дзейнасцю.
СУПРАЦОЎНІЦТВА З TIKTOK
Офіс Святланы Ціханоўскай правёў перамовы з прадстаўнікамі TikTok. У выніку былі разблакаваныя акаўнты Латушкі і Ціханоўскай. Таксама размаўлялі пра падтрымку беларускіх медыя, блогераў, і беларускай мовы на платформе.
СПРАВАЗДАЧА ГРАМАДЗЯНСКАЙ СУПОЛЬНАСЦІ
Напярэдадні афіцыйнай прэзентацыі праўладнай справаздачы Беларусі па Мэтах устойлівага развіцця (МУР) у ААН, беларуская грамадзянская супольнасць прадставіла альтэрнатыўную справаздачу. Заява дарадцы Святланы Ціханоўскай па прававых пытаннях Леаніда Марозава з гэтай нагоды: «Дзякуючы вам свет можа ўбачыць не фасад, а сутнасць таго, што адбываецца ў Беларусі — без прыкрасаў і маніпуляцыяў».
СВЯТЛАНА ЦІХАНОЎСКАЯ ДА ГАДАВІНЫ ЗАТРЫМАННЯ АЛЕСЯ БЯЛЯЦКАГА
Заснавальніка Праваабарончага цэнтра «Вясна» і лаўрэата Нобелеўскай прэміі міру Алеся Бяляцкага затрымалі 14 ліпеня 2021 года. Святлана Ціханоўская з нагоды чацвёртай гадавіны затрымання праваабаронцы: «Такія людзі, як Алесь, — гэта сумленне нашай краіны. Мы здолеем захаваць яго спадчыну і наблізіць той дзень, калі Алесь будзе зноў на свабодзе займацца справай свайго жыцця — дапамагаць іншым».
З ЧЫМ СУСТРАКАЕЦЦА МОЛАДЗЬ У БЕЛАРУСІ
Дарадца Святланы Ціханоўскай па моладзевай палітыцы і студэнцтве Маргарыта Ворыхава распавяла, з чым сутыкаецца беларуская моладзь: «Маладыя спецыялісты ў Беларусі зарабляюць у 5 разоў менш, чым іх аднагодкі ў Еўропе. Школьнікаў з дзяцінства вучаць рыць акопы і патруляваць межы».
АКАДЭМІЯ ЖАНОЧАГА ПАЛІТЫЧНАГА ЛІДАРСТВА
У межах Акадэміі жаночага палітычнага лідарства прайшла анлайн-сустрэча з Габрыэлай Свароўскай — былой дыпламаткай і эксперткай у галіне правоў чалавека, якая падзялілася досведам сваёй палітычнай і прафесійнай кар’еры, адказала на пытанні ўдзельніц. Сустрэча праведзеная прадстаўніцай Офіса Святланы Ціханоўскай у Чэхіі Крысцінай Шыянок.
МЕДЫЯ
Радыё Свабода (Беларусь), POLITICO (Міжнароднае), Алеся Бацман (Украіна), БелСАТ (Беларусь), Дождь (Расія), The Sunday Times (Вялікабрытанія), BBC (Міжнароднае), Die ZEIT (Германія), DeutschlandRadio (Германія), Die ZEIT (Германія).
