Сёння Святлана Ціханоўская з працоўным візітам у Бруселі. Адна з ключавых падзеяў — прамова на Парламенцкай Асамблее НАТА дзеля падтрымкі краінаў-партнёраў і пераходных дэмакратыяў. Сёлета фокус — на адносінах паміж НАТА і ЕС па трэку ўстойлівасці дэмакратыі.
Сваю прамову беларуская лідарка прысвяціла нядаўняму вызваленню мужа пасля пяці гадоў зняволення, а таксама будучыні Беларусі і ролі дэмакратычных сілаў у гэтым працэсе:
«Як дэмакратычныя сілы Беларусі, мы гатовыя весці нашую краіну да дэмакратыі і еўрапейскага шляху развіцця. Мы ўжо рыхтуем рэформы, якія дапамогуць інтэграваць Беларусь у еўрапейскую і еўраатлантычную супольнасць.
Нядаўна на саміце НАТА мы прэзентавалі Red Paper па беларуска-еўрапейскіх рамках бяспекі. Яна дэманструе, што Беларусь — гэта не толькі крыніца пагрозы, але і магчымасць для ўмацавання нашай калектыўнай бяспекі.
Толькі дэмакратычная Беларусь можа быць гарантам міру і стабільнасці ў рэгіёне.
Менавіта таму я заўсёды паўтараю: падтрымка беларускага дэмакратычнага руху — гэта не дабрачыннасць, а інвестыцыі ў нашую агульную будучыню».
