СУСТРЭЧА Ў СЕЙМЕ ЛІТВЫ
У Сейме Літвы адбылося пашыранае пасяджэнне дэпутацкай групы «За дэмакратычную Беларусь» з удзелам Святланы Ціханоўскай і прадстаўнікоў дэмакратычных сілаў Беларусі. Бакі абмеркавалі пытанні падтрымкі палітвязняў, беларускамоўнай адукацыі, прававога статусу беларускіх добраахвотнікаў ва Украіне, а таксама падрыхтоўку дакументаў аб партнёрстве і павазе да нацыянальнай ідэнтычнасці.
РЭАКЦЫЯ НА ВЫНІКІ ВЫБАРАЎ У ПОЛЬШЧЫ
У Польшчы скончыліся прэзідэнцкія выбары 2025. Святлана Ціханоўская прывітала абранага Прэзідэнта Польшчы Караля Наўроцкага: «Мае шчырыя віншаванні Каралю Наўроцкаму. Я ўпэўненая, што разам з абраным прэзідэнтам Польшчы мы пабудуем такія ж моцныя і плённыя адносіны».
АФЛАЙН-ПРЭЗЕНТАЦЫЯ КАНЦЭПЦЫІ ЛЮСТРАЦЫІ
Офіс Святланы Ціханоўскай працягвае прэзентаваць Канцэпцыю люстрацыі для Беларусі — дакумент, які прапануе краіне новы шлях кадравага аднаўлення з улікам сённяшніх рэпрэсіяў. На пытанні пра неабходнасць люстрацыі, яе формы, катэгорыі асобаў і міжнародны досвед адказалі дарадцы Святланы Ціханоўскай — Аляксандр Дабравольскі і Анатоль Лябедзька — падчас адкрытай дыскусіі.
Акрамя таго, першая афлайн-прэзентацыя Канцэпцыі люстрацыі адбылася ў Эстоніі.
Яшчэ можна далучыцца да абмеркавання дакумента праз:
– форму зваротнай сувязі на беларускай мове;
– форму зваротнай сувязі на рускай мове;
– электронную пошту transitionaljustice@tsikhanouskaya.org
ФУТБОЛЬНЫ МАТЧ У ПАДТРЫМКУ ПАЛІТЗНЯВОЛЕНЫХ ЖУРНАЛІСТАЎ
У Вільнюсе адбыўся футбольны матч паміж дэпутатамі Сейма Літвы і камандай Офіса Святланы Ціханоўскай. Галоўная мэта матча — выказванне падтрымкі палітзняволеным журналістам у Беларусі, якія апынуліся за кратамі, бо казалі праўду.
КРУГЛЫ СТОЛ ПА ЗАКОНАПРАЕКЦЕ АБ МЯСЦОВЫМ САМАКІРАВАННІ
У прадстаўніцтве дэмакратычных сілаў Беларусі ў Эстоніі прайшоў круглы стол, прысвечаны рэформам мясцовага самакіравання і магчымасцям іх адаптацыі для дэмакратычнай Беларусі. Удзельнікі абмеркавалі досвед Эстоніі, Бельгіі і ЗША, асноўныя дасягненні і памылкі рэформаў. Была дасягнутая дамова з мясцовымі экспертамі аб аналізе ўжо падрыхтаванага законапраекта для дэмакратычнай Беларусі».
УДЗЕЛ У ПЛЕНАРНАЙ СЕСІІ CDBIO
Маргарыта Ворыхава, дарадца Святланы Ціханоўскай па моладзевай палітыцы і студэнцтву, наведала Страсбург, дзе прыняла ўдзел у пленарнай сесіі CDBIO у Страсбургу і ў падрыхтоўцы Рэкамендацыі Камітэта міністраў Рады Еўропы па мірнай адукацыі. Падчас рабочых дыскусіяў яна прасоўвала ўключэнне ў Рэкамендацыю беларускага выпадку як прыкладу сістэмнага выцяснення моладзі з адукацыйнай і палітычнай прасторы, рэпрэсіяў за ўдзел у грамадзянскіх ініцыятывах.
ВЫНІКІ ТРАЎНЯ
Каманда Офіса Святланы Ціханоўскай падрыхтавала вынікі працы за месяц: галоўныя падзеі з палітычнага жыцця супрацоўнікаў, новыя даследаванні і значныя дасягненні актывістаў і арганізацыяў. Поўны спіс можна паглядзець па спасылцы.
ПРАСОЎВАННЕ КУЛЬТУРНІЦКІХ ПАДЗЕЯЎ ЛЕТА
Офіс Святланы Ціханоўскай падрыхтаваў спіс 6-ці культурніцкіх падзеяў, на якія дакладна варта звярнуць увагу гэтым летам.
МЕДЫЯ
BBC Outlook (Міжнароднае), Зеркало (Беларусь), Радыё Свабода (Беларусь), Hudson Institute (Міжнароднае), Hudson.org (ЗША), Euractiv (Міжнароднае).
