10 красавіка стала вядома, што беларускі палітвязень Аляксандр Кулініч памёр у турме. Святлана Ціханоўская пракаментавала: «Кожны чалавек, які знаходзіцца пад вартай, мае права на належны догляд і абарону здароўя. Відавочна, што гэта не было забяспечана. Я выказваю глыбокія спачуванні родным і блізкім Аляксандра. У беларускіх турмах гінуць людзі, і мы павінныя рабіць усё магчымае, каб запусціць працэс вызвалення тых, хто апынуўся за кратамі з-за палітычнага пераследу».
ВІЗІТ НА КІПР
9-10 красавіка Святлана Ціханоўская наведала Кіпр з працоўным візітам. У яго межах беларуская лідарка сустрэлася з прэзідэнтам Кіпра і спікеркай Парламента. Акрамя таго, Ціханоўская выступіла на слуханнях у Парламенце Кіпра, а таксама правяла брыфінг для дыпламатаў з 16 краінаў свету ў амбасадзе Польшчы на Кіпры.
Асноўнымі тэмамі перамоваў былі 1) шляхі рашэння праблемаў беларускай дыяспары на Кіпры, 2) стварэнне групы «За дэмакратычную Беларусь» у кіпрскім Парламенце, 3) падтрымка рэлакаваных беларускіх бізнесаў, 4) ціск на рэжым і яго шматбаковая ізаляцыя і 5) выпрацоўка адзінай пазіцыі па сітуацыі ў Беларусі на міжнароднай арэне.
ВІЗІТ У ГРЭЦЫЮ
11-12 красавіка Святлана Ціханоўская знаходзілася ў Грэцыі з працоўным візітам, дзе ўзяла ўдзел у Дэльфійскім эканамічным форуме і правяла сустрэчы з прэзідэнткай Грэцыі, мэрам Афінаў і былым прэм’ер-міністрам краіны. Беларуская лідарка прывезла былому прэм’еру Папандрэу архіўныя матэрыялы пра ягонага прапрадзеда Зыгмунта Мінейку – ён нарадзіўся ў Беларусі і браў актыўны ўдзел у паўстанні Каліноўскага.
На Дэльфійскім форуме беларуская лідарка сустрэлася з міністрам замежных справаў Польшчы Радаславам Сікорскім. Бакі абмеркавалі ваенна-палітычную сітуацыю ў Беларусі, праблему атрымання польскіх візаў для беларусаў унутры краіны, а таксама фармалізацыю адносінаў з Аб’яднаным Пераходным Кабінетам.
РЭАКЦЫЯ НА ПРАПАНОВУ ПАПРАЎКІ Ў СЕЙМЕ ЛІТВЫ
9 красавіка стала вядома пра прапанову папраўкі ў Сейме Літвы, якая даўнімае ўвядзенне новых падставаў для анулявання ВНЖ беларусаў. Святлана Ціханоўская адрэагавала на падзею: «На дадзены момант гэта не прыняты закон, а толькі прапанова. Мы на сувязі з дэпутатамі Сейма – і паспрабуем іх пераканаць, што ў такім выглядзе папраўкі не павінны быць прынятыя. Мы цудоўна разумеем, што насцярожвае літоўскіх партнёраў. Але ў той жа час важна памятаць: адказнасць за гэта ляжыць не на беларусах, а на Лукашэнку».
ВЫБАРЫ Ў КААРДЫНАЦЫЙНУЮ РАДУ
Выбары ў Каардынацыйную Раду, назначаныя на травень, ужо не першы дзень выклікаюць актыўныя спрэчкі ў сеціве. Эксперты Офіса на чале са старэйшым палітычным дарадцам Аляксандрам Дабравольскім далі адказы на самыя актуальныя пытанні.
III БЕЛАРУСКІ БІЗНЕС-ФОРУМ
9 красавіка ў Вільні прайшоў III Беларускі бізнес-форум, арганізаваны Асацыяцыяй беларускага бізнесу за мяжой ABBA і Літоўскай канфедэрацыяй працадаўцаў. Святлана Ціханоўская выступіла на форуме з вітальнай прамовай. Па выніках мерапрыемства АВВА падпісала пагадненне аб супрацоўніцтве з Літоўскай канфедэрацыяй працадаўцаў.
МОЛАДЗЕВАЯ ПАЛІТЫКА
У сакавіку дарадца Святланы Ціханоўскай па моладзевай палітыцы і студэнцтву Маргарыта Ворыхава некалькі тыдняў знаходзілася ў працоўнай паездцы ў ЗША. Рэзультатам працы стала 1) дамова з Фондам Абамы пра разгляд магчымасцяў для атрымання стыпендыяў моладзевымі лідарамі Беларусі, а таксама 2) дамова пра магчымы запуск пілотнага праекта, скіраванага на пераадоленне няроўнасці ў сферы адукацыі, сумесна з Educational Justice.
МЕДЫЯ. Святлана Ціханоўская дала інтэрв’ю Cyprus Times (Кіпр), Giorgos A. Papandreou (Грэцыя), Cyprus Mail (Кіпр), BNT (Балгарыя).
