11-12 красавіка Святлана Ціханоўская знаходзілася ў Грэцыі з працоўным візітам, дзе брала ўдзел у Дэльфійскім эканамічным форуме і праводзіла шэраг сустрэчаў з ключавымі палітыкамі краіны.
З прэзідэнткай Грэцыі Катэрынай Сакелярапулю беларуская лідарка абмеркавала бягучую сітуацыю ў Беларусі і рэгіёне – і звярнула ўвагу суразмоўцы на важнасць прыцягнення рэжыму да адказнасці. У прыватнасці – за захоп самалёта Ryanair, выкраданне ўкраінскіх дзяцей з акупаваных тэрыторыяў і злачынствы супраць чалавецтва. Асобна бакі прааналізавалі праблемы легалізацыі беларусаў у Грэцыі. Акрамя таго, ішла гаворка пра распрацоўку праграмаў рэабілітацыі для дзяцей рэпрэсаваных беларусаў.
З мэрам Афінаў Харысам Дукасам Святлана Ціханоўская вяла гаворку пра падтрымку беларускай дыяспары ў сталіцы і ініцыятываў культурнай дыпламатыі: рэзідэнцыяў для беларускіх творцаў, стажыровак для «Кадравага рэзерву», судзеянне сумленнаму беларускага бізнесу, арганізацыю выставаў і беларуска-грэцкіх мерапрыемствах.
З былым прэм’ер-міністрам Грэцыі Георгіасам Папандрэу Святлана Ціханоўская пабывала ў шэрагу гістарычных месцаў Афінаў, дзе прэм’ер распавядаў пра традыцыі грэцкага парламентарызму. Адзначым, што прапрадзед Папандрэу – Зыгмунт Мінейка – нарадзіўся ў Беларусі і браў актыўны ўдзел у паўстанні Каліноўскага. Менавіта таму беларуская лідарка прывезла архіўныя матэрыялы пра гэтага выбітнага чалавека: радавод, фотаздымкі продкаў, а таксама матэрыялы пра маёнтак і землі Мінейкаў у Беларусі.
Напрыканцы сустрэчы Ціханоўская запрасіла Папандрэу ў Вільню наведаць месцы пахавання яго сваякоў і падарыла кнігу мемуараў Зыгмунта «З Тайгі пад Акропаль» на беларускай мове.
