Святлана Ціханоўская паведаміла пра змяненні ў сваёй камандзе:
«Таццяна далучылася да каманды ў 2021 годзе і ўзяла на сябе адказнасць за адзін з самых складаных і важных напрамкаў — адукацыю і навуку. За гэтыя чатыры гады яна зрабіла велізарны ўнёсак: дапамагала беларускім выкладчыкам і студэнтам, якія пацярпелі ад рэжыму, шукала міжнародную падтрымку для нашых навукоўцаў, спрыяла развіццю беларускамоўнай адукацыі для дзяцей у эміграцыі.
Я вельмі ўдзячная ёй за прафесіяналізм, прынцыповасць і адданасць сваёй справе. Гэта была праца, якая патрабавала мудрасці і настойлівасці, і Таццяна зрабіла ўсё, каб беларускія педагогі і даследчыкі адчувалі, што яны не адны».
Таццяна Шчытова:
«Для мяне было вялікім гонарам далучыцца да каманды Святланы Ціханоўскай, каб дапамагаць адстойваць інтарэсы беларусаў у сферы адукацыі і навукі. Чатыры гады інтэнсіўнай працы ў Офісе сталі для мяне крыніцай унікальнага палітычнага і грамадзянскага досведу. Я шчыра ўдзячная ўсім, чый удзел і садзейнічанне спрыялі захаванню незалежнай супольнасці беларускіх эдукатараў і навукоўцаў. Міжнародная падтрымка і плённае супрацоўніцтва розных арганізацый грамадзянскай супольнасці дапамаглі зрабіць шмат важнага для беларускай адукацыі і навукі.
Рада ўсведамляць, што ў гэты цяжкі для Беларусі перыяд мае веды і прафесійны вопыт аказаліся запатрабаваны для ўмацавання беларускай прадэмакратычнай супольнасці. Адукацыя — гэта адзін з галоўных паказчыкаў сучаснасці і дэмакратычнасці грамадства і дзяржавы. Я перакананая, што беларускі народ мае вялізны інтэлектуальны патэнцыял, які ў хуткім часе дапаможа пабудаваць у Беларусі сапраўднае «грамадства ведаў».
Таццяна Шчытцова зрабіла важны ўнёсак у працу Офіса і падтрымку беларускай супольнасці. Сярод асноўных вынікаў:
- Адвакацыя і пошук дапамогі для беларускіх выкладчыкаў, навукоўцаў і студэнтаў, якія пацярпелі ад рэжыма;
- Пошук падтрымкі для развіцця беларускамоўнай адукацыі для дзяцей, якія апынуліся у вымушанай эміграцыі і падтрымку для працягу акадэмічнай дзейнасці беларускіх навкоўцаў;
- Развіццё супрацоўніцтва паміж беларускімі і заходнімі вучонымі;
- Фасілітацыя дыялогу паміж прадстаўнікамі беларускай экспертнай, педагагічнай і навуковай супольнасці наконт стана рэчаў у сістэме адукацыі Беларусі і падрыхтоўкі да будучай рэформы адукацыі ў Беларусі;
- Каардынацыя працы па стварэнню дарожных мап рэфармавання сярэдняй адукацыі;
- Каардынацыя працы па стварэнню дарожнай мапы дэмакратызацыі вышэйшай адукацыі;
- Удзел у працы над Стратэгіяй пераходу да Новай Беларусі.
