На другі дзень працоўнага візіту ў Брусель беларуская лідарка ўзяла ўдзел у Brussels Forum 2025, арганізаваным Нямецкім фондам Маршала ЗША.
Гэта ўжо 20-е пасяджэнне форуму, які з’яўляецца адной з ключавых платформаў для дыялогу паміж палітычнымі лідарамі, экспертамі і прадстаўнікамі грамадзянскай супольнасці.
Тэма гэтага года «Парушанае партнёрства: як выжыць трансатлантычнаму супрацоўніцтву?» Удзельнікі абмяркоўвалі шляхі аднаўлення даверу і ўмацавання партнёрства паміж ЗША і Еўропай ва ўмовах глабальнай нестабільнасці. Сярод выступоўцаў прысутнічалі вярхоўная прадстаўніца ЕС у пытаннях знешняй палітыкі і бяспекі Кая Калас, намеснік міністра развіцця і тэхналогій Польшчы Міхал Бараноўскі, былы галоўнакамандуючы Аб’яднанымі ўзброенымі сіламі НАТА ў Еўропе Кёрціс Скапароці.
За гады існавання форум даў магчымасць выказацца многім сусветным лідарам, у тым ліку:
- Камале Харыс, былой віцэ-прэзідэнтцы ЗША;
- Жазэпу Барэлю, вярхоўнаму прадстаўніку ЕС па замежных справах;
- Урсуле фон дэр Ляен, прэзідэнтцы Еўрапейскай камісіі;
- Енсу Столтэнбергу, генеральнаму сакратару НАТА;
- Ангеле Меркель, былой канцлерцы Германіі;
- Джасціну Трудо, прэм’ер-міністру Канады.
Беларуская лідарка выступіла з прамовай, у якой падкрэсліла важную ролю Беларусі ў бяспекі Еўропы будучыні і заклікала да актыўнай падтрымкі дэмакратычных сілаў краіны.
Святлана Ціханоўская: «Я казала, што бяспека, дэмакратыя і дабрабыт узаемазвязаныя і не могуць існаваць адно без аднаго. Казала пра незалежнасць Беларусі: яна цяпер пад пагрозай — і нам крытычна выцягнуць Беларусь з лап Расіі. Пра неабходнасць чалавечых кантактаў, выдачы візаў і дапамогі беларусам. Цяпер вырашаецца лёс Еўропы, а Беларусь узятая ў закладнікі. І нам патрэбная дапамога Еўропы і свабоднага свету, каб гэта зрабіць. Таксама я казала пра перамовы па Украіне: сітуацыя ў любы момант можа памяняцца і для Беларусі — і мы павінны быць гатовы скарыстацца гэтым момантам».
