Сёння ў сістэме агульнай сярэдняй адукацыі Беларусі існуе мноства праблемаў. Як адзначаюць эксперты, гэта і ізаляванасць ад сучасных тэндэнцыяў, і састарэлыя стандарты навучання, і аўтарытарны менеджмент.
Па ініцыятыве Офіса Святланы Ціханоўскай і пры ўдзеле Аб’яднанага Пераходнага Кабінета, адны з лепшых беларускіх экспертаў у галіне сярэдняй адукацыі распрацавалі праект дарожнай мапы, каб загадзя падрыхтавацца да рэформаў у галіне сярэдняй адукацыі. Яе мэта – забяспечыць стабільную працу і эфектыўную трансфармацыю сістэмы школьнай адукацыі пасля дэмакратычнага транзіту ўлады ў краіне.
Дарадца Святланы Ціханоўскай па пытаннях адукацыі і навукі Таццяна Шчытцова адзначае: «Мы можам і павінныя ўжо сёння рыхтавацца да рэформаў. Першы крок – гэта распрацоўка дакладнага плана дзеянняў, якія трэба будзе выканаць у самым пачатку, калі адбудзецца змена недэмакратычнай улады. Гэта забяспечыць падмурак для паспяховай дэмакратычнай трансфармацыі сістэмы адукацыі ў нашай краіне».
Падрабязней азнаёміцца з дакументамі (на рускай і беларускай мовах) вы можаце па спасылцы, а прапановы, каментары і заўвагі даслаць у @AskOffice_Bot ці на пошту askoffice@tsikhanouskaya.org.
