Урачыстая цырымонія адбылася напрыканцы першага дня афіцыйнага візіту дэмакратычнай лідаркі ў Варшаву.
Падчас цырымоніі было адзначана некалькі асоб, якія праявілі выключную адданасць сваёй працы і барацьбе за дэмакратычныя каштоўнасці.
Медалём Францыска Скарыны была ўзнагароджаная Альжбэта Смулкова – мовазнаўца, славістка, беларусістка, першая амбасадарка Польшчы ў Беларусі.
Медаль Францыска Скарыны ўручаецца асобам за выбітныя заслугі ў прафесійнай дзейнасці ў галіне навукі, адукацыі і культуры, а таксама за значны ўклад у развіццё духоўнага і інтэлектуальнага патэнцыялу беларускага народа.
Медалём «За плённую працу на карысць Беларусі» ўзнагароджаныя:
▪️Ян Маліцкі – прафесар, дырэктар Цэнтра ўсходнееўрапейскіх даследаванняў Варшаўскага ўніверсітэта;
▪️Роберт Тышкевіч – польскі палітык, выдавец, грамадскі дзеяч;
▪️Мацей Радзівіл – грамадскі дзеяч, фінансіст, мецэнат.
Гэты медаль уручаецца за выбітныя дасягненні ў прафесійнай і грамадскай дзейнасці, накіраваныя на карысць беларускага народа і дзяржавы ў розных сферах.
Медалём «За гонар і годнасць» быў адзначаны:
▪️Андрэй Янушкевіч – беларускі гісторык, выдавец, дырэктар выдавецтва «Янушкевіч».
Гэтая ўзнагарода прысуджаецца тым, хто праявіў выключную адданасць у барацьбе за свабоду, нацыянальныя каштоўнасці і правы чалавека, і страціў усё ў гэтай барацьбе.
Цырымонія завяршылася нефармальным абменам думкамі і нэтворкінгам.
