Беларуская лідарка наведала адзін з самых прэстыжных універсітэтаў Амерыкі, які ўваходзіць у знакамітую Лігу плюшчу. Яна выступіла перад студэнтамі ды экспертамі разам з гісторыкам Цімаці Снайдэрам – спецыялістам па гісторыі Усходняй Еўропы.
Падчас выступу Ціханоўская распавяла пра чаканні ад стратэгічнага дыялогу «ЗША – Беларусь», што распачнецца ўжо заўтра, а таксама падзялілася бачаннем наконт стратэгіі ЗША па Беларусі і развіцця беларуска-ўкраінскіх адносінаў.
Ва ўніверсітэце Святлана Ціханоўская сустрэлася з беларусамі, якія прыехалі на гэтую сустрэчу з усёй Амерыкі. Таксама ў Еле зараз працуюць некалькі беларусаў – рэжысёр Андрэй Курэйчык і прафесар эканомікі Андрэй Цывінскі.
Напрыканцы дня беларуская лідарка сустрэлася з прадстаўнікамі Елю і прапанавала стварыць беларускі цэнтр ва ўніверсітэце, а таксама ўвесці стыпендыі для нашых студэнтаў і даследчыкаў. Адна з міжнародных стыпендыяльных праграм Еля, Maurice Greenberg, ужо даступная для беларусаў.
