Беларуская лідарка ўзяла ўдзел у З’ездзе нямецкай партыі Зялёных у Карлсруэ разам з віцэ-канцлерам Германіі Робертам Хабэкам і міністаркай замежных справаў Германіі Аналенай Бэрбак. Мерапрыемства сабрала каля 2 тысяч чалавек.
Падчас сваёй прамовы Святлана Ціханоўская падзякавала нямецкім палітыкам за апякунства над беларускімі палітвязнямі – такіх у партыі Зялёных больш за 50. Таксама яна выказала спадзяванне, што прынятая два тыдні таму рэзалюцыя па Беларусі ў Бундэстагу спросціць працэдуру легалізацыі беларусаў у Германіі.
Беларуская лідарка звярнулася да ўдзельнікаў З’езду:
«Дапамажыце нам не толькі наблізіць змены ў краіне, але і падрыхтавацца да іх. Я прыйшла сюды з некалькімі практычнымі просьбамі:
– Падтрымлівайце еўрапейскія памкненні беларусаў.
– Працягвайце дапамагаць палітвязням, рэпрэсаваным, а таксама СМІ і грамадзянскай супольнасці.
– Паспрыяйце прыцягненню рэжыму Лукашэнкі да адказнасці за ўсе здзейсненыя злачынствы.
– Дапамажыце Украіне выйграць вайну, бо яе перамога будзе канчатковай паразай Пуціна і Лукашэнкі.
Разам мы зможам пабудаваць Еўропу, якая будзе больш трывалай, устойлівай і аб’яднанай, чым калі-небудзь раней».
