Беларуская лідарка наведала рэгіянальны офіс YouTube у Берліне, дзе сустрэлася з кіраўніцай YouTube, адказнай за сувязі з урадамі, Сабін Франк. На сустрэчы абмеркавалі падтрымку беларускай мовы на платформе YouTube, прасоўванне беларускага кантэнту і блакаванне рэжымнай прапаганды.
На сустрэчы гаварылі аб падтрымцы беларускай мовы на платформе YouTube. Цяпер яна даступная ў інтэрфейсе, падтрымліваецца ў бальшыні сэрвісаў YouTube і дазваляецца манетызацыя беларускамоўнага кантэнту.
Прадстаўніца YouTube адзначыла, што магчымасць падтрымкі беларускай мовы ў Google Ads ужо абмяркоўваецца.
YouTube адсочвае і імкнецца выдаляць «пакаянныя» відэа, запісаныя рэжымам. Каналы і акаўнты прапагандыстаў і арганізацыяў, супраць якіх уведзеныя санкцыі ЕС, ЗША ці Вялікабрытаніі, таксама выдаляюцца з платформы.
Беларуская лідарка звярнула ўвагу на дамінаванне расійскага і прапагандысцкага кантэнту ў трэндах YouTube, і што незалежныя медыя па нейкіх прычынах у трэнды не трапляюць. Прадстаўніца YouTube паабяцала звярнуць на гэта ўвагу.
Таксама абмеркавалі магчымасць арганізацыі трэнінгаў для беларускіх медыя і ініцыятываў з удзелам спецыялістаў YouTube.
Акрамя таго, YouTube прапануе бясплатныя рэкламныя бюджэты для беларускіх грамадзянскіх арганізацыяў і медыя праз партнёрскую арганізацыю TechSoup.
