У Еўрапарламенце прайшоў Міжпартыйны Форум «8+100», на якім сабраліся прадстаўнікі беларускіх і еўрапейскіх палітычных партыяў. Дарадца Святланы Ціханоўскай па канстытуцыйнай рэформе і парламенцкім супрацоўніцтве Анатоль Лябедзька распавёў пра вынікі форума:
«Форум «8+100» – гэта восем беларускіх партыяў, якія заявілі ў Еўрапарламенце: мы працуем дзеля пазітыўных пераменаў у Беларусі. Гэта больш за 100 еўрапейскіх партыяў, якія заявілі рэжыму Лукашэнкі: для нас гэтыя 8 партыяў з’яўляюцца прадстаўнікамі беларускага народу. Мы іх падтрымліваем, мы з імі супрацоўнічаем. Ужо зараз ёсць некалькі практычных вынікаў:
1) на наступным тыдні Еўрапарламент прыме рэзалюцыю аб сітуацыі з палітвязнямі ў Беларусі. Спадзяемся, што там будзе пункт аб стварэнні міжнароднага фонду для падтрымкі нашых герояў;
2) удзельнікі Форума падтрымалі еўрапейскую перспектыву Беларусі;
3) на Форуме было заяўлена аб нелегітымнасці «выбараў» Лукашэнкі і аб тым, што іх вынікі не могуць быць прызнаныя міжнароднай супольнасцю».
