Сёння ў Варшаве стартавала чацвёртая Канферэнцыя дыяспараў. Пятніца на форуме прысвечаная самым разнастайным сайд-івэнтам. У прыватнасці эксперты і спікеры правядуць:
— Круглы стол пра культурніцкую дыпламатыю;
— Дыскусію пра фінансаванне культурніцкіх ініцыятываў;
— Сустрэчу з Народнымі амбасадамі;
— Моладзевы сайд-івэнт «Масты без межаў».
Распачаўся працоўны дзень важнейшым дакладам ад ініцыятывы BELPOL. Дакумент, які прэзентавалі Мацвей Купрэйчык і Уладзімір Жыгар, — гэта першы сістэматызаваны доказ удзелу рэжыму Лукашэнкі ў вайне, падрыхтаваны шырокім экспертным колам. Матэрыялы даследавання базуюцца на інфармацыі з адкрытых і закрытых крыніцаў.
Святлана Ціханоўская, якая наведала прэзентацыю даклада, адзначыла:
«Даклад, які мы прадставілі сёння, — фундаментальная праца. Яна аналізуе не толькі ўнутраную палітыку рэжыму Лукашэнкі, але і яго ролю ў вайне супраць Украіны.
Гэта яшчэ адзін доказ таго, што рэжым стаў актыўным саўдзельнікам агрэсіі: прадастаўляў тэрыторыю, вайсковую інфраструктуру, удзельнічаў у фільтрацыі палонных, інфармацыйнай вайне, рэпрэсіях супраць антываенных актывістаў.
Такія матэрыялы важныя, каб дамагчыся справядлівасці. А таксама для будучыні Беларусі. Бо калі мы хочам будаваць новую, дэмакратычную краіну — мы павінны ведаць праўду, называць злачынствы і дамагацца адказнасці».
Азнаёміцца з дакладам можна па спасылцы.
