З 2021-га палітыкі, грамадскія дзеячы і журналісты Польшчы, Украіны і Літвы штогод праводзяць маштабны Форум, дзе абмяркоўваюць актуальныя пытанні рэгіёна, распрацоўваюць крокі па ўмацаванні культурных і эканамічных сувязяў, а таксама сумесную стратэгію дзеянняў на міжнароднай арэне.
Упершыню ў гісторыі Форума на ім прагучаў голас беларусаў. Святлана Ціханоўская выступіла з прамовай перад удзельнікамі, а яе намеснік у Аб’яднаным Пераходным Кабінеце Валер Кавалеўскі ўзяў удзел у панэльнай дыскусіі.
Беларуская лідарка падкрэсліла, што ўсе ўдзельнікі Форума маюць агульную спадчыну і падзяляюць адны і тыя ж каштоўнасці. Яна адзначыла, што лёс Беларусі наўпрост уплывае на будучыню яе суседзяў. «Калі Беларусь і Украіна стануць членамі Еўрасаюза, спробы Расіі аднавіць сваю імперыю будуць асуджаныя на правал. Менавіта таму Пуцін падтрымаў тэрор Лукашэнкі супраць беларусаў. Менавіта таму Пуцін развязаў вайну супраць Украіны. І менавіта таму так важна падтрымліваць дэмакратычную Беларусь і Украіну. Бо гэта інвестыцыя ў нашу бяспечную, квітнеючую і дэмакратычную еўрапейскую будучыню», – заявіла Ціханоўская.
