Сёння, 18 жніўня, Святлана Ціханоўская выступіла на акцыі ў Вільні, падзякавала беларусам за падтрымку Сяргея Ціханоўскага і адказала на пытанні людзей.
Ціханоўская: «Сёння дзень, які яшчэ два гады таму мы кожны год святкавалі з Сяргеем. Ён заўсёды быў гаспадаром святкавання, любіў кампаніі, сяброў і быў завадатарам. З ім заўсёды было лёгка. У яго такая харызма, усе любілі прыходзіць да яго ў госці.
Вельмі дзіўна праводзіць святы без яго. Але я вельмі радая, што, нягледзячы на тое, што побач яго няма, са мной сустракае яго дзень нараджэння столькі людзей. Дзякуй, што вы побач. Дзякуй, што вы не забываецесч. Праз адваката я перадала, што яго дзень нараджэння святкуюць тысячы людзей, што яго памятаюць, любяць і ганарацца ім. Сяргей стаў ахвярай гэтага рэжыму, але даў нам магчымасць працягваць барацьбу».
