Вынікі сустрэчы з Джулі Фішэр
Джулі Фішэр наведвае Вільнюс. 4 лютага яна правяла сустрэчы са Святланай Ціханоўскай, а таксама аддзелам міжнародных адносінаў Офісу Ціханоўскай. 5 лютага Амбасадарка ЗША правядзе сустрэчы з прадстаўнікамі Кабінета прадстаўнікоў Ціханоўскай. Гэта першая замежная паездка новага Амбасадара ЗША.
Святлана ЦІханоўская павінашавала амбасадарку з прызначэннем і падзякавала за дапамогу, якую ЗША аказваюць беларусам. Падчас сустрэчы абмяркоўваліся двухбаковыя адносіны паміж ЗША і Беларуссю, а таксама магчымыя варыянты вырашэння палітычнага крызісу.
Што абмяркоўвалі Святлана Ціханоўская і Амбасадарка ЗША:
– Як спыніць гвалт і дабіцца вызвалення палітвязняў. Ціханоўская распавяла пра справы Няронскага, Спірына, Чульцовай і Андрэевай і заклікала ЗША прыняць неадкладныя захады для вызвалення зняволеных. Яна падкрэсліла, што вызваленне і рэабілітацыя усіх палітвязняў з’яўляецца неабходнай умовай для пачатку дыялогу, а гандаль палітвязнямі недапушчальны.
– Як зрабіць выкананне Акта аб дэмакратыі ў Беларусі і Маскоўскага Мэханізму АБСЭ больш эфектыўным. Ціханоўская звярнула ўвагу на неабходнасць кропкавых санкцыяў супраць кампаній, арганізацый і кашалькоў Лукашэнкі. Паводле Ціханоўскай, ЗША павінны працаваць у звязцы з Вялікабрытаніяй, Еўрасаюзам і Канадай.
– Як ЗША маглі б падтрымаць незалежныя СМІ, сем’і рэпрэсаваных, мясцовыя ініцыятывы і праекты грамадзянскай супольнасці.
– Падтрымка ЗША прыватнага бізнэсу, які пацярпеў у выніку рэпрэсій уладаў. Доўгатэрміновая праграма эканамічнай падтрымкі Беларусі.
– Афіцыйны візіт Святланы Ціханоўскай у ЗША і праграму сустрэчаў.
