Святлана Ціханоўскай завяршае свой працоўны візіт у Фінляндыю. Яна сустрэлася з прэзідэнтам Саўлі Ніінісцё, прэм'ер-міністаркай Саннай Марын, міністрам замежных спраў Пекам Хаавіста, ганаровым прэзідэнтам ПА АБСЕ Ілкам Канервам, былой прэзідэнткай Тар'яй Халанен і прадстаўнікамі фінскага парламента.
Падчас сустрэч з фінскімі палітыкамі Святлана Ціханоўская:
– заклікала Фінляндыю сачыць за справамі палітвязняў, рэпрэсіямі супраць страйкаму Беларуськалія, а таксама распавяла пра апошнія прысуды журналісткам Кацярыне Барысевіч, Кацярыне Андрэевай і Дар'і Чульцовай, лекару Арцёму Сарокіну, пра судовыя працэсы над Віктарам Бабарыкам і Сяргеем Ціханоўскім;
– падзякавала МЗС Фінляндыі за падтрымку кампаніі па пераносе Чэмпіянату свету па хакеі з Мінска і заклікала падтрымаць расследаванне датычнасці старшыні Федэрацыі хакея Беларусі Дзмітрыя Баскава да забойства Рамана Бандарэнкі, пачатага Міжнароднай федэрацыяй хакея;
– прапанавала падтрымаць выключэнне Белтэлерадыёкампаніі з Еўрапейскага вяшчальнага саюза;
– з прэм'ер-міністаркай Саннай Марын абмеркавала падтрымку беларускіх палітвязняў і жаночага руху. Ціханоўская прапанавала выказаць салідарнасць з Беларуссю 8 сакавіка і 25 сакавіка, пераглядзець супрацоўніцтва з беларускімі дзяржаўнымі кампаніямі;
– на сустрэчы з прэзідэнтам Саўлі Ніінісцё Святлана Ціханоўская падзялілася сваім бачаннем правядзення новых сумленных і празрыстых выбараў, канстытуцыйнай рэформы, ролі Расіі і ЕС у вырашэнні беларускага крызісу;
– на сустрэчах з ганаровым прэзідэнтам ПА АБСЕ Ілкам Канервам і дэпутатамі Фінскага парламента абраная лідарка Беларусі абмеркавала стварэнне дыялогавай пляцоўкі пры міжнароднай медыяцыі, а таксама магчымасці арганізацыі новых выбараў восенню 2021 у Беларусі;
– прапанавала міністру замежных спраў Фінляндыі разглядзець адкрыццё фінскай амбасады ў Мінску пасля свабодных выбараў, распрацаваць доўгатэрміновы план двухбаковага супрацоўніцтва паміж Фінляндыяй і дэмакратычнай Беларуссю.
Прадстаўнікі Фінляндыі заявілі, што падтрымаюць чацвёрты пакет санкцый ЕС, медыяцыю АБСЕ ў пытанні вырашэння палітычнага крызісу ў Беларусі, акажуць дапамогу незалежным СМІ і праваабаронцам, пераглядзяць супрацоўніцтва з кампаніямі, якія падтрымліваюць рэжым Лукашэнкі.
Photo: Matti Porre/Office of the President of the Republic of Finland
Photo by FinnishGovernment
