28 верасня ў Познані прайшоў другі дзень Кангрэса, які быў прысвечаны размове пра палітзняволеных. У сустрэчы ўдзельнічалі як былыя зняволеныя, так і іх сем’і. З уступнымі словамі выступілі дарадца Святланы Ціханоўскай па прававых пытаннях Леанід Марозаў і прадстаўніца па сацыяльнай палітыцы Аб’яднанага Пераходнага Кабінета Беларусі Вольга Зазулінская.
Другі дзень Кангрэса стаў пляцоўкай, на якой беларускія палітвязні агучылі важныя для сябе тэмы і праблемы. Асобнымі блокамі абмяркоўвалася, якой падтрымкі бракуе пацярпелым ад рэжыму і якім чынам варта карэктна прадстаўляць тэму палітзняволеных у медыя. Асаблівая ўвага была нададзеная неабходнасці дакументаваць досвед палітычнага зняволення і факты катаванняў.
Кангрэс сабраў прадстаўнікоў і прадстаўніц 21 структуры: арганізацыяў дапамогі палітвязням, праваабарончых арганізацыяў, асацыяцыяў і аб’яднанняў палітвязняў, ініцыятываў дапамогі. Сярод іх актыўны ўдзел у дыскусіях узялі:
Грамадская арганізацыя Dapamoga;
Беларуская асацыяцыя адвакатаў правоў чалавека;
Free Belarus Center;
Ініцыятыва Volnyja;
Reforum Help;
Фонд «Краіна для жыцця»;
Дзіцячы летнік «Зубровыя сцежкі»;
Асацыяцыя беларусаў Італіі «Talaka»;
Міжнародны камітэт па расследванні катаванняў;
Хрысціянская візія для Беларусі;
DissidentBY;
Фундацыя «Беларусь 2020»;
Напішы ліст палітвязню;
Інфармацыйная служба Вясны;
Асацыяцыя палітвязняў Беларусі (АПБ);
Беларуская асацыяцыя палітвязняў «Да волі!» (БАП);
Аб’яднанне Беларускіх палітвязняў RE:BELarus;
Аб’яднанне беларусак з досведам палітычнага зняволення і іншыя арганізацыі.
Упершыню шырокай грамадскасці быў прадстаўлены праект Севярына Квяткоўскага Belarus.2020, прысвечаны беларускім пратэстам і пытанням калектыўнай памяці. Цягам дня дзейнічаў «Кірмаш праектаў», у якім узялі ўдзел ініцыятывы і фонды Напішы ліст палітвязню, DissidentBY, Фонд «Краіна для жыцця», Libereco ды іншыя.
Мерапрыемства паказала, што нягледзячы на розныя погляды на палітычны крызіс у Беларусі і падыходы да яго вырашэння, тэма палітзняволеных застаецца аб’яднаўчай.
Беларускія палітзняволеныя — гэта агульная адказнасць. За кратамі несправядліва застаюцца не толькі беларускія грамадзяне і грамадзянкі, але і замежныя. І менавіта таму гэта праблема міжнароднага маштабу, якая патрабуе сумеснага рашэння.
Выказваем удзячнасць Akademia Lubranskiego, якая стала пляцоўкай для другога дня Кангрэсу. Мадэраваў мерапрыемства былы палітзняволены культурніцкі арт-мэнэджэр Уладзь Булаўскі. Таксама да Кангрэса далучаўся Анджэй Прыба — дырэктар Цэнтра аксіялогіі новых тэхналогіяў і грамадскіх пераменаў у Познані.
