Падчас візіту ў Варшаву 14 студзеня Святлана Ціханоўская сустрэлася з валанцёрамі і валанцёркамі, якія штодзённа дапамагаюць беларускім палітвязням і іх сем’ям.
У размове прынялі ўдзел каля 40 чалавек, у прыватнасці — прадстаўніцы ініцыятывы дапамогі былым беларускім палітвязням у адаптацыі і рэсацыялізацыі «Вольныя». Сустрэча была арганізаваная каардынатаркай ініцыятывы Веранікай Станкевіч.
Падчас размовы беларуская лідарка выказала словы глыбокай падзякі валанцёрам за іх дабрыню, адданасць і чалавечнасць, а таксама адзначыла важнасць іх працы для захавання падтрымкі тых, хто пацярпеў ад рэпрэсіяў.
Адбылася сесія пытанняў і адказаў, падчас якой удзельнікі сустрэчы дзяліліся досведам, абмяркоўвалі актуальныя патрэбы нядаўна вызваленых палітвязняў (у тым ліку — групы палітзняволеных, вызваленых 13 снежня) і іх сем’яў, праблемы адаптацыі і рэсацыялізацыі, а таксама магчымасці для далейшай падтрымкі.
