Падчас працоўнага візіту ў Сафію беларуская лідарка сустрэлася з прэм’ер-міністрам Балгарыі. Нікалай Дэнкаў выказаў спадзяванне на шчыльнае супрацоўніцтва паміж краінай і дэмакратычнымі сіламі Беларусі.
Адна з ключавых мэтаў візіту – аднавіць адносіны, якія зруйнаваў рэжым Лукашэнкі. Святлана Ціханоўская запрасіла Балгарыю далучыцца да групы сяброў Беларусі ў АБСЕ, а таксама падтрымаць працу Кантактнай групы ў Радзе Еўропы.
Апорнай тэмай дыялогу стала пагроза незалежнасці Беларусі з боку Расіі і саўдзел рэжыму ў вайне. Бакі абмеркавалі шляхі прыцягнення рэжыму да адказнасці: лідарка распавяла, што каманда НАУ сабрала доказы, неабходныя для пачатку расследавання. Яны былі перададзеныя ў ААН на мінулым тыдні.
Асаблівую ўвагу Святлана Ціханоўская надала палітвязням – і падкрэсліла: неабходныя тэрміновыя крокі па іх вызваленні, асабліва тых, хто знаходзіцца ў гуманітарным спісе і ў рэжыме інкамунікада.
Таксама палітыкі абмеркавалі ціск на рэжым – і як зрабіць яго больш эфектыўным, без ізаляцыі беларусаў. Святлана Ціханоўская заклікала працягваць выдаваць візы і падтрымліваць тых, хто збег ад рэпрэсіяў. Акрамя таго, лідарка распавяла пра новы беларускі пашпарт і выказала спадзяванне, што Балгарыя падтрымае гэты праект.
Падчас сустрэчы таксама абмеркавалі супрацоўніцтва ў сферы асветы, культуры і адукацыі. Асобна пагаварылі пра правядзенне канферэнцыі балгарскіх і беларускіх гісторыкаў.
Напрыканцы сустрэчы прэм’ер-міністр, міністарка замежных справаў і Святлана
Ціханоўская правялі супольную прэс-канферэнцыю для балгарскіх і міжнародных СМІ.
