СУСТРЭЧА З НОВЫМ СПІКЕРАМ СЕЙМА ЛІТВЫ
Святлана Ціханоўская правяла сустрэчу з новым спікерам Сейма Літвы Юозасам Олекасам. Юозас Олекас — да нядаўняга часу кіраўнік дэпутацкай групы Сейма Літвы «За дэмакратычную Беларусь». Святлана Ціханоўская падзякавала спікеру за прынцыповую пазіцыю і непахісную падтрымку Беларусі з боку Літоўскага Сейма.
ПРЭС-КАНФЕРЭНЦЫЯ ПАЛІТВЯЗНЯЎ У СЕЙМЕ ЛІТВЫ
У Сейме Літвы адбылася прэс-канферэнцыя, у якой прынялі ўдзел вызваленыя на мінулым тыдні палітвязні Дзмітрый Кучук, Мікола Дзядок і Ларыса Шчыракова, дарадца Святланы Ціханоўскай па парламенцкім супрацоўніцтве і канстытуцыйнай рэформе Анатоль Лябедзька, а таксама спікер Сейма Літвы Юозас Олекас і дэпутаты групы «За дэмакратычную Беларусь» Русланас Барановас і Томас Тамілінас.
СВЯТЛАНА ЦІХАНОЎСКАЯ ПРА ВЫЗВАЛЕННЕ ПАЛІТВЯЗНЯЎ
16 верасня на волю ў Беларусі выйшлі 25 вязняў, частка з якіх была асуджаная па палітычна матываваных артыкулах. Святлана Ціханоўская з гэтай нагоды: «Гэта важны гуманітарны крок, які павінен працягвацца. Патрэбна вызваліць і рэабілітаваць усіх палітвязняў, спыніць рэпрэсіі».
НОВЫ ДАРАДЦА ПА АДУКАЦЫІ І НАВУЦЫ
Агучана імя новага дарадцы Святланы Ціханоўскай па адукацыі і навуцы — гісторык і антраполаг Павел Церашковіч. Павел шмат гадоў працуе ў сферы адукацыі: выкладаў у БДУ, быў дэканам і кіраўніком Сената ў ЕГУ, стажыраваўся ў Нью-Ёрку і Оксфардзе, мае больш за сотню навуковых публікацыяў.
СВЯТЛАНА ЦІХАНОЎСКАЯ ДА 34 ГАДАВІНЫ ЗАЦВЕРДЖАННЯ НАЗВЫ РЭСПУБЛІКІ БЕЛАРУСЬ
19 верасня 1991 года Вярхоўны Савет БССР зацвердзіў назву беларускай дзяржавы — Рэспубліка Беларусь і яе дзяржаўныя сімвалы: бел-чырвона-белы сцяг і герб «Пагоня». Святлана Ціханоўская да гэтай падзеі: «34 гады таму было замацавана тое, што ўжо даўно жыло ў сэрцах беларусаў і беларусак: мы маем сваю краіну, сваю назву і свае сімвалы. І пакуль беларусы трымаюцца за свае сімвалы і сваю годнасць — краіна жыве. Я веру, што 19 верасня будзе адзначацца ў новай Беларусі, у той, дзе няма забароненых сцягоў, а ёсць народ, які сам вызначае свой шлях».
60-АЯ СЭСІЯ РАДЫ ПА ПРАВАХ ЧАЛАВЕКА ААН
19 верасня ў межах 60-й сесіі Рады па правах чалавека ААН прайшоў інтэрактыўны дыялог з прадстаўніцай Групы незалежных экспертаў па Беларусі Карынай Маскаленка і сайд-івэнт «Give a Voice to the Victims: Human Rights Violations in Belarus», арганізаваны пастаянным прадстаўніцтвам Літвы пры ААН. На абодвух мерапрыемствах узнімалася сітуацыя з правамі чалавека ў Беларусі. Выступоўцы адзначылі, што нягледзячы на нядаўнія вызваленні, рэпрэсіўная машына застаецца актыўнай: новыя затрыманні і паўторныя арышты адбываюцца рэгулярна, змушаючы многіх беларусаў і беларусак шукаць прытулак за мяжой.
ЛЕАНІД МАРОЗАЎ — ПРА МІКАЛАЯ СТАТКЕВІЧА
11 верасня ў Беларусі былі памілаваныя і прымусова вывезеныя ў Літву 52 палітвязні. Сярод іх быў і асуджаны на 14 гадоў калоніі палітык Мікалай Статкевіч. Аднак ён адмовіўся пакідаць краіну і правёў на мяжы некалькі гадзінаў, адкуль яго вывезлі невядомыя ў масках у невядомым напрамку. Дарадца Святланы Ціханоўскай па прававых пытаннях у размове з выданнем «Медиазона» падкрэсліў, што па законе памілаванне немагчыма адмяніць і яно не можа залежаць ад прымусовай высылкі за мяжу. Ён назваў магчымае вяртанне Статкевіча ў калонію і прымусовую дэпартацыю іншых палітвязняў часткай злачынства супраць чалавечнасці і актам, які груба супярэчыць Канстытуцыі і міжнародным абавязацельствам Беларусі.
НОВЫ ДАКЛАД ПА ПРАВАХ ЧАЛАВЕКА Ў БЕЛАРУСІ
Група незалежных экспертаў ААН апублікавала даклад, у якім адзначаецца, што парушэнні правоў чалавека ў Беларусі маюць сістэматычны характар і з’яўляюцца часткай дзяржаўнай палітыкі падаўлення іншадумства. Паводле даклада, да адказнасці могуць быць прыцягнутыя не толькі сілавікі, але і вышэйшыя кіраўнікі рэжыму, уключаючы Лукашэнку. Ахвяры маюць права на праўду і кампенсацыю за шкоду.
МЕДЫЯ
BBC News (Міжнароднае), Настоящее время (Міжнароднае), Радыё Свабода (Беларусь), Радыё Свабода (Беларусь), БелСАТ (Беларусь), BNS (Літва), BNS (Літва), ELTA (Літва), ELTA (Літва), 15min (Літва), 15min (Літва).
