У Сейме Літвы адбылася прэс-канферэнцыя, у якой прынялі ўдзел вызваленыя на мінулым тыдні палітвязні Дзмітрый Кучук, Мікола Дзядок і Ларыса Шчыракова, а таксама спікер Сейма Літвы Юозас Олекас і дэпутаты групы «За дэмакратычную Беларусь» Русланас Барановас і Томас Тамілінас.
Дарадца Святланы Ціханоўскай па парламенцкім супрацоўніцтве і канстытуцыйнай рэформе Анатоль Лябедзька падзякаваў былым палітзняволеным за ўдзел у сустрэчы. Ён падкрэсліў, што канферэнцыя сведчыць: літоўскаму боку сапраўды важна, што адбываецца ў Беларусі.
Анатоль Лябедзька:
«На ўзроўні Сейма ёсць разуменне: без дэмакратычнай, еўрапейскай Беларусі не будзе бяспечнай Літвы. Удзел спікера Юозаса Олекаса пацвярджае, што тэма беларускіх палітзняволеных з’яўляецца парламенцкім прыярытэтам. Прагучалі моцныя словы падтрымкі Мікалаю Статкевічу і ўсім, хто застаецца за кратамі. Такія мерапрыемствы дапамагаюць трымаць пытанне беларускіх палітвязняў у міжнародных структурах і ўплываць на палітычныя рашэнні — як у Літве, так і ў Еўрасаюзе».
Мерапрыемства арганізаванае парламенцкай групай «За дэмакратычную Беларусь» і Офісам Святланы Ціханоўскай.
