ПРЭС-КАНФЕРЭНЦЫЯ З ВЫЗВАЛЕННЫМІ ПАЛІТВЯЗНЯМІ
22 снежня ў Вільні адбылася прэс-канферэнцыя з удзелам беларускіх палітвязняў, якія 13 снежня былі вызваленыя з турмаў і прымусова вывезеныя з Беларусі ва Украіну, а 18 снежня прыбылі ў Літву. У прэс-канферэнцыі прыняла ўдзел Святлана Ціханоўская.
Падчас канферэнцыі палітвязні распавялі пра свой вопыт знаходжання ў турмах, катаванні і першыя дні на волі.
Святлана Ціханоўская:
«Сёння мы пачулі жывыя гісторыі людзей, якія прайшлі праз зняволенне, засталіся моцнымі і не страцілі надзею. Кожная такая гісторыя — напамін пра тое, за што мы змагаемся. І мы не спынімся, пакуль кожны палітвязень не будзе вольным, у свабоднай Беларусі».
Запіс прэс-канферэнцыі даступны на афіцыйным YouTube-канале Святланы Ціханоўскай.
КАЛЯДЫ 25 СНЕЖНЯ
Святлана Ціханоўская павіншавала беларусаў і беларусак, якія святкуюць Божае Нараджэнне 25 снежня: «Гэтае свята заўсёды вяртае нас да простых рэчаў: да сямейных гутарак, да спакойнага вечара, да пачуцця, што побач ёсць людзі, якім мы неабыякавыя. Беражыце сябе і сваіх блізкіх. Светлых і спакойных святаў, мае дарагія».
Акрамя гэтага, лідарка заклікала далучыцца да калядных збораў.
СВЯТЛАНА ЦІХАНОЎСКАЯ — ПРА ПЕРАСЛЕД ЖУРНАЛІСТАЎ
Беларусь займае 4-е месца ў свеце па колькасці зняволеных журналістаў. 23 снежня Ціханоўская выступіла з прамовай у дачыненні бяспекі журналістаў:
«Дзякуючы вашай працы рэжым не здолеў схаваць праўду ад беларусаў і сусвету. Дзякуючы вашай працы яна прабіваецца праз турмы, цэнзуру, хлусню і чарговыя абмежаванні ад рэжыму. І кожны з вас сваёй працай набліжае дзень, калі беларуская журналістыка здыме кайданкі».
СУСТРЭЧЫ З ЖЫГІМАНТАСАМ ПАВІЛЁНІСАМ І ТОМАСАМ ТАМІЛІНАСАМ
23 снежня дарадца Ціханоўскай па пытаннях дыпламатыі Дзяніс Кучынскі і дарадца па парламенцкім супрацоўніцтве Анатоль Лябедзька сустрэліся з Жыгімантасам Павілёнісам, намеснікам кіраўніка дэпутацкай групы «За дэмакратычную Беларусь» у Сейме Літвы. Акрамя гэтага, 25 снежня прадстаўнікі офісу сустрэліся з Томасам Тамілінасам, намеснікам кіраўніка партыі і фракцыі «Дзеля Літвы». Падчас сустрэч былі абмеркаваны супраца паміж беларускімі і літоўскімі партыямі і маладзёвымі партыйнымі арганізацыямі і перспектывы падпісання праекта Пагаднення аб супрацы Сейма Літоўскай Рэспублікі і дэмакратычных сілаў Беларусі.
ЯК ЗВЯЗАЦЦА З ОФІСАМ СВЯТЛАНЫ ЦІХАНОЎСКАЙ
Калі вам патрэбная дапамога, кансультацыя ці вы хочаце падзяліцца ідэяй, праблемай або інфармацыяй — вы можаце бяспечна звяртацца ў Офіс Святланы Ціханоўскай. Каналы камунікацыі, праз якія можна бяспечна пакінуць свой запыт, атрымаць інфармацыю ці задаць хвалюючыя вас пытанні Офісу:
– праз старонку з асноўнымі кантактамі;
– далучыцца да асабістых размоваў са Святланай Ціханоўскай;
– пакінуць зварот да Офіса праз спецыяльную форму;
– звярнуцца па пытаннях інтэрв’ю і супрацоўніцтва са СМІ да прэс-службы;
– накіраваць афіцыйныя запрашэнні і дыпламатычныя прапановы;
– падпісацца на рассылку пра навіны і мерапрыемствы;
– пакінуць ананімны зварот у фармаце Black Box — бяспечна і канфідэнцыяльна.
