З 9 па 13 снежня пройдуць Дні Беларусі ў Бруселі, якія ладзяцца Еўрапейскай службай знешніх дзеянняў і Еўрапейскай камісіяй у супрацоўніцтве з Еўрапейскім парламентам. Дні Беларусі – гэта серыя мерапрыемстваў у рамках 4-й сустрэчы Кансультатыўнай групы ЕС з беларускімі дэмакратычнымі сіламі. На івэнтах ЕС збярэ больш за 100 прадстаўнікоў беларускіх дэмакратычных сілаў, грамадзянскай супольнасці, незалежных СМІ, праваабарончых арганізацыяў сумесна з палітычным кіраўніцтвам інстытутаў ЕС і міжнародных арганізацыяў.
Асноўныя мэты мерапрыемстваў:
- прыцягнуць увагу да становішча беларускіх палітвязняў;
- працягнуць аказваць ціск на рэжым Лукашэнкі, акцэнтаваць увагу ЕС на сітуацыі ў Беларусі;
- давесці еўрапейскай супольнасці, што ўмовы для правядзення свабодных і справядлівых прэзідэнцкіх выбараў 2025 года ў Беларусі не выконваюцца;
- захаваць Беларусь на высокім узроўні ў парадку дня ЕС у пачатку працы новага заканадаўчага органа і новай Еўрапейскай камісіі;
- прадставіць вынікі палітычнай і фінансавай падтрымкі ЕС народу Беларусі, яго імкненню да стварэння дэмакратычнай і суверэннай краіны, а таксама яго культуры і самабытнасці.
Святлана Ціханоўская:
«Мерапрыемствы ў Бруселі – важны крок, каб Беларусь заставалася на парадку дня міжнароднай супольнасці. Гэта магчымасць яшчэ раз засяродзіць увагу на праблемах нашай краіны і абмеркаваць шляхі канкрэтнай дапамогі беларусам. Менавіта такія мерапрыемствы паказваюць: будучыня Беларусі важная не толькі для нашых людзей, але і для ўсяго дэмакратычнага свету».
