Учора, у Дзень вайсковай славы Беларусі, у Празе прайшоў сайд-івэнт «Спадчына Аршанскай перамогі: адказ дэмакратычнай Беларусі на вучэнні «Захад-2025». Ён адбыўся ў межах Канферэнцыі па ўсходняй палітыцы Чэхіі 2025.
Падзея аб’яднала прадстаўнікоў беларускай дэмакратычнай супольнасці і чэшскіх экспертаў, каб абмеркаваць разгортванне расійскіх войскаў у Беларусі, адпрацоўку сцэнарыяў прымянення ядзернай зброі, а таксама наступствы вучэнняў «Захад-2025», якія будуць праходзіць 12–16 верасня.
З вітальным словам выступіла кіраўніца Офіса дэмакратычных сілаў Беларусі ў Чэхіі Крысціна Шыянок. Падчас прамовы яна звярнула ўвагу на сімвалічнае значэнне Аршанскай перамогі для сучаснай барацьбы беларусаў.
У мерапрыемстве таксама прынялі ўдзел аналітык AMO Міхал Лябдушка, першы намеснік старшыні Рады БНР Сяргей Навумчык, які правёў цырымонію ўшанавання памяці беларускай добраахвотніцы Марыі Зайцавай, і кіраўнік Інстытута бяспекавых даследаванняў імя Касцюшкі Вадзім Мажэйка.
Падчас дыскусіі былі прэзентаваныя дакументы «Захад-2025: пад туманам вучэнняў» і Red Paper па рэгіянальнай бяспецы Беларусі.
