Нядаўна на будынку Еўрапейскага гуманітарнага ўніверсітэта (ЕГУ) у Вільні з’явіліся правакацыйныя надпісы. Падобныя акты вандалізму ўжо здзяйсняліся ў дачыненні да Беларускага дома, крамы «Кропка», цэнтра дапамогі палітычным уцекачам у Вільні і іншых беларускіх месцаў.
Дарадца Святланы Ціханоўскай па пытаннях адукацыі і навукі Таццяна Шчытцова пракаментавала чарговы акт вандалізму і адзначыла:
«Беларусы, якія вымушаныя былі пакінуць сваю краіну, не толькі цэняць гасціннасць Літвы, але і паважаюць яе культуру, законы і суверэнітэт. Нашая агульная гістарычная спадчына – гэта падстава для гонару і супрацоўніцтва.
ЕГУ мае вялікае значэнне для нашага грамадства, бо дае магчымасць беларускай моладзі атрымаць сучасную адукацыю ў сферы сацыяльных і гуманітарных навук, свабодную ад прапагандысцкага ціску.
Спробы пасеяць варожасць паміж літоўцамі і беларусамі праз падобныя правакацыі, на шчасце, застаюцца беспаспяховымі. Беларусь і Літва маюць багатую гісторыю, якая вучыць нас супрацоўніцтву і ўзаемапавазе. Мы асуджаем любыя дзеянні, накіраваныя на падрыў даверу і дружалюбных адносінаў нашых народаў».
