Сёння, 13 траўня, Святлана Ціханоўская правяла ў Вільнюсе брыфінг для прадстаўнікоў дыпламатычнага корпусу. У брыфінгу ўдзельнічалі прадстаўнікі Літвы, Ірландыі, Італіі, Малдовы, Латвіі, Нідэрландаў, Ізраіля, Фінляндыі, Эстоніі, Харватыі, Вялікабрытаніі, Швецыі, Францыі, Іспаніі, Нарвегіі, Румыніі, ЗША, Германіі, Японіі, Польшчы, Чэхіі, Украіны і Паўночнай Рады.
Сустрэча прайшла ў Офісе Святланы Ціханоўскай у Вільнюсе. Ціханоўская падкрэсліла, што Офіс працягвае працу, а Літва застаецца адным з найбліжэйшых і найважнейшых партнёраў дэмакратычных сілаў:
«Я вельмі радая, што гэты брыфінг я праводжу тут, у нашым Офісе ў Вільнюсе. Я хачу падкрэсліць, што нягледзячы на пашырэнне нашай дзейнасці ў Польшчы, Офіс Святланы Ціханоўскай застаецца адзінай і непадзельнай установай. І я глыбока ўдзячны Літве за захаванне нашай дыпламатычнай акрэдытацыі».
Асноўныя тэмы сустрэчы:
– вызваленне палітвязняў;
– легалізацыя беларусаў за мяжой;
– праца Офіса Святланы Ціханоўскай у Літве і Польшчы;
– міжнародны ціск на рэжым;
– супрацьдзеянне транснацыянальным рэпрэсіям.
Асобна Ціханоўская падзякавала Польшчы за падтрымку і салідарнасць з беларусамі, ЗША — за намаганні па вызваленні палітвязняў, Швецыі, Нарвегіі і Германіі — за падтрымку грамадзянскай супольнасці і незалежных медыя. Таксама яна падзякавала Іспаніі за прызнанне беларускіх пашпартоў са скончаным тэрмінам дзеяння, Малдове — за ўдзел у вызваленні зняволеных, а Літве — за ініцыятыву па прыцягненні рэжыму Лукашэнкі да адказнасці праз Міжнародны крымінальны суд.
Ціханоўская заклікала партнёраў захоўваць адзінства ў палітыцы адносна Беларусі, падтрымліваць беларускія дэмакратычныя інстытуты і незалежныя медыя, дапамагаць з легалізацыяй беларусаў у выгнанні, а таксама не спыняць ціск на рэжым да вызвалення ўсіх палітвязняў і рэальных сістэмных зменаў у Беларусі.
Святлана Ціханоўская:
«Шлях да свабоднай, дэмакратычнай і еўрапейскай Беларусі складаны, і часам ён можа здавацца вельмі доўгім. Але я ведаю, што мы не адны на гэтым шляху. Побач з беларусамі ёсць сябры і саюзнікі, якія працягваюць падтрымліваць нас. Дзякую вам за гэтую салідарнасць. Менавіта такая падтрымка дае нам сілы працягваць працу дзеля свабоды людзей, дзеля нашай незалежнасці і дзеля дэмакратычнай будучыні Беларусі».
