Святлана Ціханоўская: «Я ведаю, што Прэзідэнт Трамп зрабіў гэты званок дзеля важнай гуманітарнай місіі — вызвалення нашых людзей і спынення рэпрэсіяў. Гэта спроба выратаваць жыцці нявінных людзей і дабіцца сістэмных зменаў у Беларусі. І я ўпэўнена, што ў Прэзідэнта Трампа ёсць для гэтага ўплыў і ўсе неабходныя рычагі.
Рэжым павінен не толькі вызваліць людзей, але і спыніць рэпрэсіі. Усе спісы палітвязняў мы ўжо перадалі ЗША. Вызваленыя мусяць мець магчымасць застацца ў Беларусі, калі захочуць, а тыя, хто выехаў пад пагрозай рэпрэсіяў, павінны мець магчымасць бяспечна вярнуцца. Гэта неабходныя крокі для дээскалацыі.
На жаль, досвед паказвае, што Лукашэнку верыць нельга. Трэба глядзець на справы, а не словы».
Сёння прадстаўнікі Офіса Святланы Ціханоўскай правялі размову з Крысам Смітам, прадстаўніком Дзярждэпартамента, які адказвае за Беларусь і браў удзел у вызваленні палітвязняў.
Раней Святлана Ціханоўская накіравала ліст Прэзідэнту Трампу з просьбай паспрыяць у вызваленні палітвязняў, перадала прапановы ў Белы дом па магчымых кроках дзеля вызвалення, выступіла з прапановамі да адміністрацыі ЗША, а таксама агучвала сваё бачанне вырашэння крызісу ў Беларусі ў Foreign Affairs і Hudson Institute.
