Беларуская лідарка выступіла на з’ездзе Еўрапейскай дэмакратычнай партыі ў італьянскай Фларэнцыі анлайн. Усяго ў мерапрыемстве ўдзельнічалі каля 1000 дэлегатаў з розных краінаў свету.
Прыводзім самыя яскравыя цытаты з прамовы Ціханоўскай.
📌 «На палітычных сустрэчах я стараюся тлумачыць, што Лукашэнка не прадстаўляе беларускі народ. Ён здрадзіў нашай краіне, ён здрадзіў нашаму народу, ён уцягнуў нашую краіну ў вайну. І я прашу адрозніваць беларускі рэжым і беларускі народ».
📌 «Барацьбу за свабоду, барацьбу за дэмакратыю нельга выйграць у адзіночку. Неабходна, каб дэмакратыі былі смялейшымі і больш рашучымі пры сутыкненні з дыктатарамі – такімі як Пуцін і Лукашэнка».
📌 «Нам вельмі патрэбная падтрымка для нашых рэпрэсаваных, для тых, хто працягвае змагацца на месцах, для СМІ. Праз ізаляцыю рэжыму не ізалюйце народ. Выдавайце візы і адкрывайце межы для беларусаў, як гэта рабілі дэмакратычныя краіны падчас «халоднай вайны». Сумна бачыць, што некаторыя краіны абмяркоўваюць забароны для беларусаў. Забараніце рэжым, а не народ».
📌 «Для адважнага беларускага народа, які працягвае супраціўляцца рэпрэсіям, маё пасланне – будзьце смелымі. Будзьце цярплівымі. І ніколі не здавайцеся. Вы вартыя лепшай будучыні. Мы пазбавімся ад тыраніі. Мы вырвемся з кіпцюроў Расіі. Пуцін і Лукашэнка пацерпяць паразу. Надыдзе дзень, калі Беларусь стане членам Еўрапейскага саюза. Гэта вялікая мара, але гэтая мара вартая барацьбы».
