Святлана Ціханоўская выступіла з прамовай на першым Беларускім бізнес-форуме ў Вашынгтоне:
«Паважаныя арганізатары і ўдзельнікі Беларускага бізнес-форуму ў Вашынгтоне,
Дарагія сябры!
Віншую вас з правядзеннем гэтага гістарычнага мерапрыемства – такога маштабнага беларускага бізнес-форуму ў ЗША. Жадаю выказаць шчырую падзяку прадстаўнікам Праграмы развіцця камерцыйнага права Міністэрства гандлю ЗША за неацэнную дапамогу ў арганізацыі гэтага мерапрыемства, а таксама Асацыяцыі беларускага бізнесу за мяжой за іх высілкі ў яго арганізацыі.
Сёння Беларусь становіцца ўсё больш эканамічна залежнай ад Расіі. Доля Расіі ў знешнім гандлі Беларусі расце двухзначнымі тэмпамі штогод з 2021 года. Расійскія інвестары і іх проксі-фірмы з’яўляюцца галоўнымі інвестарамі ў беларускую эканоміку. Расія стала адзіным замежным крэдыторам для рэжыму ў Беларусі. І так не павінна быць. Не так мы бачым будучыню Беларусі. Я з камандай і разам з мільёнамі беларусаў рашуча настроены змяніць гэта!
Я абсалютна перакананая, што Беларусь заўсёды будзе часткай сусветнай эканомікі, а не эканомікі Расіі. І калі ў маёй краіне наступяць дэмакратычныя перамены, краіны ЕС стануць нашымі асноўнымі гандлёвымі партнёрамі. Мы будзем актыўна прасоўваць заключэнне пагадненняў аб свабодным гандлі як з ЕС, так і з ЗША. І так мы створым адзін з самых прывабных бізнес-кліматаў у свеце.
Беларуская эканоміка будзе квітнець на аснове моцнага і інавацыйнага прыватнага сектара, дзякуючы чаму зможа сфарміравацца моцны сярэдні клас. Многія таленавітыя беларусы вернуцца дадому і стануць кіраваць бізнесамі, інвесціраваць у эканоміку краіны і займацца прадпрымальніцтвам. У новай Беларусі прадпрымальнікаў будуць шанаваць і паважаць не толькі за іх унёсак у эканамічны росквіт, але і за тое, што яны абараняюць нас ад дыктатуры.
Са жніўня 2020 года больш за трыста тысяч беларусаў вымушана пакінулі краіну, многім з іх прыйшлося рэлацыраваць свой бізнес або пачаць развіваць яго нанова. Для большасці зыход з краіны быў не выбарам, а неабходнасцю з-за пагрозы патрапіць у турму. Гэтыя людзі смела ўдзельнічалі ў пратэстах у Беларусі ў 2020 годзе і працягваюць смела развіваць свае бізнесы ў выгнанні.
Беларускі бізнес за мяжой ужо стаў магутнай структурай. У свеце шмат тысячаў зарэгістраваных кампаніяў з беларускім капіталам, і ЗША не выключэнне. На вядучых сусветных фондавых біржах гандлююць акцыямі буйных і вядомых айці-кампаніяў беларускага паходжання. Мноства малых і мікракампаніяў кожны дзень вядуць свой бізнес, выплачваюць падаткі і ствараюць працоўныя месцы. Многія беларусы і беларускі заснавалі стартапы, якія ў будучыні могуць стаць бізнесамі. А Асацыяцыя беларускага бізнесу за мяжой аб’ядноўвае больш за 100 вядомых кампаніяў з 10 краінаў і садзейнічае іх супрацоўніцтву і росту.
Нам трэба заставацца аб’яднанымі. Ваш голас – голас беларускіх бізнесменаў – стане нашмат мацнейшым, калі вы будзеце разам. Сёння вы дапаможаце адзін аднаму вырашыць паўсядзённыя бізнес-пытанні, абараніць свае запыты і абараніць свае правы – а заўтра вы ўбачыце, які ўклад вы ўнеслі ў палітычныя і эканамічныя рэформы ў Беларусі. Разам мы распрацуем план рэпатрыяцыі бізнесу, каб вы не забываліся на сваю Радзіму і інвеставалі ў новую, свабодную і квітнеючую Беларусь.
ЗША – важная краіна для нашага бізнесу, бо сюды паступаюць як нашыя інвестыцыі, так і нашыя тавары. На сённяшнім мерапрыемстве ў вас будзе магчымасць убачыць адзін аднаго, абмеркаваць вашыя праблемы і абмяняцца меркаваннямі. Я заклікаю ўлады ЗША працягваць прымаць беларускіх бізнесменаў і бізнес-лэдзі, бо яны не толькі знаходзяць працу для сябе, але і ствараюць новыя працоўныя месцы. Я радая, што Праграма развіцця камерцыйнага права Міністэрства гандлю і Асацыяцыя беларускага бізнесу за мяжой распрацавалі дарожную карту ўзаемадапамогі. Разам са Стратэгічным дыялогам «ЗША – дэмакратычная Беларусь» яна дапаможа нам закласці трывалы фундамент для цеснага супрацоўніцтва паміж дэмакратычнай Беларуссю і ЗША.
Хацелася б, каб гэты форум прынёс канкрэтныя вынікі як для нашай бізнес-супольнасці за мяжой, так і для дыяспары ў розных краінах. Я вельмі радая, што партнёрамі форума з’яўляюцца вядомыя арганізацыі беларускай дыяспары: Асацыяцыя беларусаў у Амерыцы і Беларуска-амерыканская асацыяцыя.
Я ганаруся беларускімі бізнесамі. І я зраблю ўсё магчымае, каб быць беларускім бізнесам было ганарова ва ўсім свеце.
Поспехаў. Давайце будаваць новую Беларусь разам».
