Падчас працоўнага візіту ў Італію Святлана Ціханоўская выступіла з лекцыяй у адной з найлепшых ВНУ свету – універсітэце Баконі ў Мілане. На сустрэчы прысутнічала каля 150-200 чалавек, сярод якіх былі не толькі студэнты, але і прадстаўнікі акадэмічнай супольнасці, журналісты і беларускія эмігранты. У прамове Ціханоўская закранула ключавыя тэмы, звязаныя з бяспекай у рэгіёне, роляй Беларусі ў сучаснай Еўропе і неабходнасцю рашучых дзеянняў для вызвалення краіны ад аўтарытарнага рэжыму.
Асноўныя тэзы, якімі падзялілася Святлана Ціханоўская:
📌 Любы мір павінен быць пастаянным рашэннем, а не часовым перамір’ем
«Часовае перамір’е дазволіць Расіі перагрупавацца і зноў напасці. Пры гэтым трансатлантычнае адзінства мае вырашальнае значэнне. Раскол гуляе на руку Пуціну. Расія імкнецца выкарыстоўваць любыя слабыя месцы ў нашым адзінстве. Нельга дапусціць, каб «мірныя перамовы» сталі інструментам для ўмацавання расійскай акупацыі. Адказнасць з’яўляецца ключавым фактарам: Пуцін і яго памагатыя павінны панесці адказнасць за свае злачынствы. У адваротным выпадку яны будуць адчуваць сябе ўпэўнена, каб зноў напасці і здзейсніць яшчэ больш злачынстваў».
📌 Беларусь і Украіна належаць да Еўропы
«Я радая, што прэзідэнт Зяленскі сказаў, што мяжой Еўропы павінна быць усходняя мяжа Беларусі. Мы вельмі згодныя з гэтым, таму што Беларусь і Украіна належаць да Еўропы. Мы не можам заставацца за «жалезнай заслонай». Краіны Усходняй Еўропы павінны падтрымліваць адна адну ў супрацьстаянні расійскаму ўплыву. Бо мы супрацьстаім аднаму і таму ж ворагу. Энергетычная незалежнасць мае вырашальнае значэнне. Мы павінны вызваліцца ад энергетычнага шантажу Расіі, як краіны Балтыі адключыліся ад расійскай энергасістэмы. Кожная краіна павінна мець права вырашаць сваю будучыню».
📌 Каб скончыць палітычны крызіс у Беларусі – патрэбныя рашучыя дзеянні
➖ Жорсткія санкцыі супраць Расіі і яе памагатых;
➖ Падтрымка актывістаў дэмакратыі і палітычных зняволеных – больш жорсткія меры супраць рэжымаў Пуціна і Лукашэнкі;
➖ Прызнанне дэмакратычнай Беларусі ў якасці легітымнага партнёра. Не ставіцца да Лукашэнкі як да Беларусі. Рэжым – гэта не народ;
➖ Падтрымка незалежных СМІ і беларускай культуры, каб супрацьстаяць расійскай прапагандзе і не дапусціць сцірання нашай нацыянальнай ідэнтычнасці;
➖ Гуманітарная падтрымка беларусаў у выгнанні – спрошчаныя віды на жыхарства, магчымасці для працы і адукацыйныя праграмы.
