У Беларусі прайшоў так званы «Адзіны дзень галасавання». Прапаганда намагалася паказаць беспрэцэдэнтную яўку і запэўніць у выкананні ўсіх электаральных працэдураў. Аднак падмануць тых, хто насамрэч ведае, што такое дэмакратыя, не атрымалася. Паглядзіце, як адрэагавалі на безвыбары прадстаўнікі дэмакратычных краінаў.
МЗС Аўстрыі: «Выбары не з’яўляюцца ні свабоднымі, ні справядлівымі. Мы працягнем працу для вольнай, незалежнай і квітнеючай Беларусі».
Украіна: «Аб’яднанне «За дэмакратычную Беларусь» заклікае міжнародную супольнасць не прызнаваць так званых выбараў і выкарыстоўваць усе сродкі, каб Лукашэнка апынуўся за кратамі».
ЗША: «Злучаныя Штаты асуджаюць фіктыўныя парламенцкія і мясцовыя выбары. Яны прайшлі ў атмасферы страху. Выбарчыя працэсы нельга назваць дэмакратычнымі».
МЗС Германіі: «Мы асуджаем сістэмныя рэпрэсіі вакол выбараў у Беларусі. Рэжым выкарыстоўвае ўсе сродкі, каб задушыць дэмакратычныя памкненні народа Беларусі».
Францыя: «Рэжым Лукашэнкі арганізуе пародыю на выбары ў заканадаўчыя органы ўлады: без апазіцыі і без міжнародных назіральнікаў. Мы просім не прызнаваць вынікаў выбараў».
Прэзідэнт ПА НАТА: «Фальшывыя выбары ў Беларусі нікога не падмануць: яны бессэнсоўныя. Нашыя ўрады і парламенты павінныя працягваць асуджаць рэпрэсіі, падтрымліваць змаганне Святланы Ціханоўскай за дэмакратычную Беларусь і заклікаць да вызвалення палітвязняў».
Заява МЗС Нарвегіі: «Фальшывыя выбары ў Беларусі ўчора ўяўляюць сабой далейшае пагаршэнне дэмакратычных прынцыпаў і асноўных свабод. Мы асуджаем сістэмныя рэпрэсіі ў Беларусі і падтрымліваем дэмакратычныя памкненні беларускага народа».
Прэзідэнт ПАРЕ: «Выбары» ў Беларусі – гэта пародыя на дэмакратыю».
Кіраўнік Камітэта па замежных справах Чэхіі: «Як назіральнік за выбарамі ў складзе місіі АБСЕ, я яшчэ памятаю адны «выбары», дзе ўсё падлічвалі, запісвалі – а потым старшыня выбарчай камісіі выцягнуў з кішэні кашулі паперку з лічбамі і зачытаў іх – гэта і быў канчатковы вынік».
Заява Вярхоўнага прадстаўніка Еўрапейскай службы знешніх сувязяў: «Відавочна, што ўмовы для свабодных і справядлівых выбараў не былі выкананыя, а новыя парламенцкія і мясцовыя чыноўнікі не маюць дэмакратычнай легітымнасці. ЕС працягвае падтрымліваць дэмакратычнае права беларускага народа абіраць сваіх прадстаўнікоў праз сапраўдныя, дэмакратычныя і празрыстыя выбары».
