У Інтэрнэце з’явіліся выявы эскіза новага беларускага пашпарта, дзе няслушна адлюстраваная беларуска-літоўская мяжа.
Офіс Святланы Ціханоўскай і Аб’яднаны Пераходны Кабінет прызналі гэта тэхнічнай памылкай і абавязаліся яе выправіць.
Валерый Кавалеўскі, прадстаўнік Аб’яднанага Пераходнага Кабінета, які каардынуе праект пашпарта, адзначыў:
«Дзякуй, што звярнулі ўвагу на памылку – яна будзе выпраўленая. Дызайн яшчэ не быў афіцыйна зацверджаны. Мы паважаем суверэнітэт, незалежнасць і недатыкальнасць тэрытарыяльнай цэласнасці Літвы».
Офіс Святланы Ціханоўскай таксама прынёс свае прабачэнні за дапушчаную тэхнічную памылку і пацвердзіў, што чарнавая версія праекта ўжо выпраўлена:
«Мы ўдзячныя ўсім, хто заўважыў і прыцягнуў увагу да гэтага пытання. Мы паважаем міжнародна прызнаныя межы Літвы, блізкага саюзніка і партнёра дэмакратычнай Беларусі».
