Офіс Ціханоўскай, Каардынацыйная Рада, Народнае Антыкрызіснае Кіраўніцтва заклікалі:
1. Выступіць з афіцыйнымі заявамі пра непрызнанне за Лукашэнкам права на правядзенне рэферэндуму. Гэта пазбавіць рэферэндум якой-небудзь палітычнай і юрыдычнай значнасці, перакрэсліць планы рэжыму на аднаўленне страчанай легітымнасці.
2. Заявіць, што ў выпадку працягу рэпрэсій у дачыненні да беларусаў, якія не падтрымліваюць імітацыйны «рэферэндум», супраць рэжыму Лукашэнкі будуць ужытыя далейшыя кансалідаваныя санкцыі.
3. Зноў публічна падтрымаць патрабаванні беларускага народа пра тое, што адзіным устойлівым выхадам з крызісу ў Беларусі з'яўляецца вызваленне палітвязняў і правядзенне новых датэрміновых прэзідэнцкіх выбараў пад міжнародным наглядам.
Тэкст ліста на беларускай мове (пераклад з англійскай):
«У канцы лютага 2022 года нелегітымны рэжым Аляксандра Лукашэнкі мае намер здзейсніць чарговае злачынства супраць беларускага народа – правесці так званы рэферэндум па змене Канстытуцыі.
Нягледзячы на страту легітымнасці пасля паразы на сфальсіфікаваных выбарах у жніўні 2020 года, рэжым апублікаваў тэкст змененай Канстытуцыі для вынясення на «рэферэндум» з мэтай імітацыі абноўленай легітымнасці. Беларусам будзе прапанавана зрабіць безальтэрнатыўны, не заснаваны на іх рэальных інтарэсах выбар паміж старой Канстытуцыяй, якая надзяліла Лукашэнку суперпрэзідэнцкімі паўнамоцтвамі, і новай Канстытуцыяй, якая далей умацуе яго ўладу праз стварэнне новага органа з практычна неабмежаванымі паўнамоцтвамі – Усебеларускага народнага сходу. Высокая верагоднасць, што месца старшыні УНС зойме сам Лукашэнка, захаваўшы пасаду прэзідэнта.
Акрамя таго, праект, які навязваецца рэжымам, прадугледжвае пажыццёвы імунітэт для Лукашэнкі і яго абарону ад судовага пераследу за злачынствы, здзейсненыя ім на пасадзе прэзідэнта. Сярод прапанаваных паправак дэманстратыўная адмова ад імкнення Беларусі да нейтралітэту і бяз'ядзернага статусу – пазіцыяў, якія карыстаюцца шырокай падтрымкай беларусаў.
У выніку паразы на выбарах Лукашэнка і ўся выканаўчая ўлада страціла сваю легітымнасць, права прадстаўляць інтарэсы народа і прымаць палітычныя рашэнні ад яго імя. Ва ўмовах палітычных рэпрэсій само правядзенне рэферэндуму немагчымае: ў краіне каля тысячы палітвязняў, амаль трыста ліквідаваных НДА, забаронена дзейнасць практычна ўсіх незалежных СМІ. Як следства – адсутнічаюць магчымасці для свабоднага абмеркавання прапанаваных паправак, выбарчыя камісіі фармуюцца непразрыста, а незалежнае назіранне за працэсам галасавання немагчыма.
Пры гэтым уладамі ігнаруюцца запыты грамадства, у прыватнасці, праект Канстытуцыі, распрацаваны Грамадскай канстытуцыйнай камісіяй, створанай па ініцыятыве дэмакратычных сілаў. Яго распрацоўка вялася больш за два гады адкрыта і прайшла грамадскія абмеркаванні. Гэты праект не плануецца выносіць на рэферэндум, што абмяжоўвае выбар грамадзян Беларусі.
У любым выпадку, галасаванне як «за» так і «супраць» паправак будзе прымальна для Лукашэнкі, але не будзе адлюстроўваць волю народа. Электаральная кампанія, якая адзіная адпавядае інтарэсам беларусаў, – гэта дэмакратычныя выбары новага прэзідэнта па міжнародных стандартах пасля вызвалення ўсіх палітычных зняволеных.
Менавіта таму дэмакратычныя сілы Беларусі распрацавалі і рэалізоўваюць адзіную стратэгію дзеянняў на рэферэндуме, заснаваную на наступных прынцыпах:
– Мы не прызнаем за Лукашэнкам права прызначаць рэферэндум і адзначаем, што ва ўмовах парушэння ўсіх грамадзянска-палітычных правоў немагчыма забяспечыць адкрытыя, дэмакратычныя працэсы абмеркавання новай рэдакцыі Канстытуцыі і галасавання.
– Мы заклікаем грамадзян Беларусі аб'явіць вотум народнага недаверу рэжыму Лукашэнкі: прыйсці на ўчасткі і зрабіць бюлетэні нядзейснымі любым зручным і даступным ім спосабам. Гэта адзіная легальная і бяспечная магчымасць пратэсту супраць «рэферэндуму» ў Беларусі сёння.
Важна адзначыць, што, рэагуючы на гэтую агульную стратэгію дзеянняў, улады ўжо актывізавалі пераслед актывістаў – павялічылася колькасць ператрусаў і іншых акцый запалохвання з боку сілавых і іншых дзяржаўных органаў.
Напярэдадні незаконнага рэферэндуму мы звяртаемся да кіраўнікоў усіх дэмакратычных дзяржаў і міжнародных арганізацый з заклікам аказаць рашучую падтрымку беларусам у барацьбе за свабоду і дэмакратыю.
Мы заклікаем:
1. Выступіць з афіцыйнымі заявамі пра непрызнанне за Лукашэнкам права на правядзенне рэферэндуму. Гэта пазбавіць рэферэндум якой-небудзь палітычнай і юрыдычнай значнасці, перакрэсліць планы рэжыму на аднаўленне страчанай легітымнасці.
2. Заявіць, што ў выпадку працягу рэпрэсій у дачыненні да беларусаў, якія не падтрымліваюць імітацыйны «рэферэндум», супраць рэжыму Лукашэнкі будуць ужытыя далейшыя кансалідаваныя санкцыі.
3. Зноў публічна падтрымаць патрабаванні беларускага народа пра тое, што адзіным устойлівым выхадам з крызісу ў Беларусі з'яўляецца вызваленне палітвязняў і правядзенне новых датэрміновых прэзідэнцкіх выбараў пад міжнародным наглядам.
Прынцыповая, паслядоўная і кансалідаваная пазіцыя міжнароднай супольнасці, заснаваная на павазе інтарэсаў беларускага народа, які рашуча адмовіўся прымаць вынікі сфальсіфікаваных выбараў 2020 года, не дазволіць рэжыму маніпуляваць «рэферэндумам» на міжнароднай арэне і стане важным складнікам падтрымкі беларусаў у іх барацьбе за дэмакратычныя правы, свабоды і правы чалавека.»
Увесь тэкст ліста – на сайце Святланы Ціханоўскай.
