На палях Давоскага форуму Святлана Ціханоўская правяла асобныя сустрэчы з прэзідэнтам Еўрапейскага Інвестыцыйнага банка Вернэрам Хоерам і прэзідэнткай Еўрапейскага банка рэканструкцыі і развіцця Адыль Рэно-Басо.
Бакі абмяркоўвалі актуальную эканамічную сітуацыю ў Беларусі і магчымасці выхаду краіны з рэцэсіі. Без сістэмных палітычных і эканамічных рэформаў гэта абсалютна немагчыма. Ціханоўская распавяла, што яе эканамічная каманда ўжо працуе над праектамі рэформаў, і запрасіла банкі падтрымаць экспертамі і экспертызай у падрыхтоўцы дакументаў.
Кіраўнікі банкаў запэўнілі Святлану Ціханоўскую, што спынілі ўсе праекты з рэжымам Лукашэнкі, і што яны будуць працягваць падтрымліваць беларусаў, у прыватнасці малыя і сярэднія бізнесы, рэпрэсаваныя рэжымам, што пераехалі ў краіны Еўрасаюза. Ціханоўская адзначыла, што падтрымка беларускіх бізнесаў за мяжой крытычна важная для новай Беларусі, бо гэтыя кампаніі вернуцца ў Беларусь пасля пераменаў. Святлана Ціханоўская прапанавала распрацаваць па Беларусі асобную праграму дапамогі, паколькі магчымасцяў працы ўнутры краіны амаль не засталося. У прыватнасці абмяркоўвалі ўдзел ЕІБ і ЕБРР у запуску супольных з Еўракамісіяй праектаў па падтрымцы рэлакаванага беларускага бізнесу.
Святлана Ціханоўская запрасіла ЕІБ і ЕБРР вярнуцца ў Беларусь пасля дэмакратычных пераменаў.
