У пасяджэнні прынялі ўдзел нацыянальная лідарка Святлана Ціханоўская, яе намеснікі па Аб’яднаным Пераходным Кабінеце Павел Латушка і Валер Кавалеўскі, намеснік прадстаўніка па замежных справах Кабінета Уладзімір Астапенка, чальцы Каардынацыйнай рады і Офіса Святланы Ціханоўскай, прадстаўнікі беларускай грамадзянскай супольнасці, незалежнай прэсы, праваабарончых арганізацый, бізнес-згуртаванняў.
Удзельнікі абмеркавалі пагрозу для Беларусі з боку расійскіх узброеных сіл і ад магчымага прыбыцця наёмнікаў групы «Вагнер», праблему незаконнага размяшчэння расійскай ядзернай зброі на тэрыторыі краіны, ролю рэжыму Лукашэнкі ў агрэсіі супраць Украіны і інш. Асобная ўвага была нададзеная рэалізацыі праекта «Пашпарт новай Беларусі», распрацоўкай якога займаецца Аб’яднаны Пераходны Кабінет.
Ва ўступным слове Святлана Ціханоўская падкрэсліла, што дэмакратычныя сілы Беларусі сумесна з еўрапейскімі партнёрамі павінны знайсці рашэнне як для сур'ёзных бягучых праблем, так і для планавання транзітнага перыяду і пачатковых рэформ у дэмакратычнай Беларусі.
«Еўрапейская перспектыва для Беларусі з’яўляецца асобным стратэгічным прыярытэтам, які можа быць рэалізаваны сумесна з Групай усебакова і сістэматычна», – адзначыла нацыянальная лідарка.
Святлана Ціханоўская выказалася наконт неабходнасці хуткіх і рашучых дзеянняў і прапанавала Жазэпу Барэлю прызначыць Спецыяльнага прадстаўніка Еўрасаюза па Беларусі для вырашэння шматлікіх задач, з якімі сутыкаюцца беларусы.
