Сёння Святлана Ціханоўская выступіла перад Камітэтам па міжнародных адносінах Палаты прадстаўнікоў Кангрэсу ЗША на слуханні па пытанні дэмакратычнага руху ў Беларусі і лідарства жанчын. Правёў слуханне Біл Кіцінг, кіраўнік падкамітэту па Еўропе, энергетыцы, навакольным асяроддзі і кібербяспецы. На слуханні таксама выступіў Крыс Сміт, чалец Камітэта і аўтар Акту аб дэмакратыі, правах чалавека і суверэнітэце Беларусі.
Святлана Ціханоўская:
– падзякавала кангрэсменам, ураду ЗША за падтрымку беларускага народа, прыняцце Акту аб дэмакратыі, правах чалавека і суверэнітэце Беларусі, увядзенне санкцый супраць памагатых рэжыму Лукашэнкі;
– распавяла пра масавыя рэпрэсіі супраць беларускага народа, праваабарончых арганізацый, незалежных медыя, а таксама пра загінулых мірных пратэстоўцаў, у тым ліку, пра Аляксандра Тарайкоўскага, Рамана Бандарэнку;
– падзялілася гісторыямі смелых беларусак, якія мірна змагаюцца за свабоду ў краіне, – Ніны Багінскай, Вольгі Хіжынковай, Алены Леўчанка, Дар'і Чульцовай, Кацярыны Андрэевай;
– распавяла пра пратэсты, што працягваюцца, акцыі салідарнасці і крэатыўныя формы супрацьстаяння рэжыму;
– заклікала ЗША ўзмацніць ціск на рэжым і дыпламатычна ізаляваць яго, увесці санкцыі супраць «кашалькоў» Лукашэнкі, судовых органаў, якія ажыццяўляюць рэпрэсіі;
– заклікала аказваць больш дапамогі беларускай грамадзянскай супольнасці, праваабаронцам, незалежным медыя, бізнесу, а таксама садзейнічаць міжнароднай медыяцыі выхаду з крызісу ў Беларусі пры пасярэдніцтве АБСЕ.
Пасля выступу Святланы Ціханоўскай кангрэсмены, якія прадстаўляюць падкамітэт, задалі абранай лідарцы Беларусі шэраг пытанняў пра сітуацыю ў Беларусі. Палітыкаў цікавіла, якая далейшая стратэгія Офіса Ціханоўскай, якая сітуацыя з мірнымі пратэстамі беларусаў, якія канкрэтныя крокі дапамогі беларусам Ціханоўская рэкамендуе Кангрэсу ЗША, як падтрымаць незалежныя медыя Беларусі, як беларусы спраўляюцца з пандэміяй ва ўмовах дыктатуры і як амерыканцы могуць далучыцца да святкавання Дня Волі 25 сакавіка. Палітыкі ЗША выказалі падтрымку беларусам і мірнай барацьбе народа за свабоду і дэмакратыю.
«Беларусы сутыкнуліся з беспрэцэдэнтным па маштабах крызісам правоў чалавека, але яны працягваюць супрацьстаяць», – падкрэсліла Святлана Ціханоўская.
Слуханні ў Кангрэсе ЗША ўзмацняюць заўважнасць праблемы, якая абмяркоўваецца, задаюць тон у абмеркаванні канкрэтнай праблемы сярод палітычнай эліты ЗША, з'яўляюцца аўтарытэтнай крыніцай пры фармаванні знешняй палітыкі ЗША.
Поўны тэкст сведкавых паказанняў Святланы Ціханоўскай на слуханні даступныя па-ангельску.
