29 жніўня ў Капенгагене, на нефармальнай сустрэчы міністраў замежных справаў ЕС (у фармаце Gymnich), Святлана Ціханоўская звярнулася да кіраўнікоў знешнепалітычных ведамстваў усіх 27 краінаў ЕС, а таксама Вялікабрытаніі, Нарвегіі і Ісландыі. У сустрэчы ўдзельнічалі еўракамісарка Марта Кос і вярхоўная прадстаўніца ЕС па замежных справах Кая Калас.
Упершыню пасля вызвалення перад еўрапейскімі дыпламатамі выступіў і Сяргей Ціханоўскі — муж Святланы і адзін з сімвалаў беларускага паўстання 2020 года.
У 10-хвіліннай прамове Ціханоўская падкрэсліла, што вызваленне Сяргея стала магчымым не праз цуд, а дзякуючы паслядоўнасці і супольным намаганням ЕС і ЗША. Ціханоўская нагадала, што за кратамі застаюцца больш за 1300 палітвязняў, у тым ліку лаўрэат Нобелеўскай прэміі міру Алесь Бяляцкі, і заклікала ЕС і ЗША каардынаваць высілкі па іх вызваленні.
Ціханоўская папярэдзіла, што і Пуцін, і Лукашэнка будуць спрабаваць падманваць заходніх лідараў, у тым ліку Дональда Трампа:
«Калі Пуцін узмацняе абстрэлы ва Украіне, Лукашэнка ўзмацняе тэрор у Беларусі. Пакуль няма ніякіх прычынаў для змякчэння санкцыяў у дачыненні да Лукашэнкі».
Ціханоўская падкрэсліла, што змены ў Беларусі не толькі магчымыя, але і непазбежныя: «Нават найбліжэйшыя да Лукашэнкі ўжо шэпчуцца пра транзіт. У Лукашэнкі няма будучыні. Яго адзіная крыніца падтрымкі — Пуцін. І нават яна не бясконцая».
Яна заклікала Еўропу рыхтавацца да постлукашэнкаўскай Беларусі і бачыць падтрымку Беларусі не як дабрачыннасць, а як інвестыцыю ў еўрапейскую бяспеку. Ціханоўская казала пра неабходнасць падтрымкі для журналістаў, праваабаронцаў, рэпрэсаваных, культурніцкіх ініцыятываў, а таксама пра прыцягненне рэжыму да адказнасці праз міжнародныя суды.
Ціханоўская нагадала пра еўрапейскія карані беларусаў: «Рэжым спрабуе знішчыць усё, што звязвае нас з Еўропай, ізаляваць беларусаў. Пазбавіць надзеі на свабоду і перамены. Але Беларусь — частка Еўропы і заўжды ёй застанецца».
Ціханоўская падкрэсліла супольнасць змагання Беларусі і Украіны: «Украіна трымае абарону — абарону ўсёй Еўропы. Сёння разам з вамі мы ўшаноўваем усіх загінулых абаронцаў Украіны, сярод якіх і 80 беларусаў. З Украінай мы змагаемся за адну будучыню».
Пасля Святланы Ціханоўскай выступіў яе муж Сяргей:
«Сёння я стаю перад вамі як свабодны чалавек — але таксама як той, хто правёў больш за пяць гадоў у беларускіх турмах, ва ўмовах, што нагадвалі сучасны ГУЛАГ. Я страціў свабоду, здароўе, маёмасць. Але найбольш балючае — я страціў гады з сям’ёй».
Ціханоўскі падзякаваў усім за намаганні па вызваленні палітвязняў:
«Рэжым думаў, што зламаў мяне. На самай справе ён толькі ўмацаваў маю рашучасць. Мая свабода не была актам добрай волі; яна была здабытая дзякуючы нястомным намаганням маёй жонкі, праз міжнародную дыпламатыю і праз цвёрдую пазіцыю нашых партнёраў — Злучаных Штатаў, Вялікабрытаніі, Канады і, вядома ж, Еўрапейскага саюза. Без вашага адзінства я б не стаяў тут сёння».
Ціханоўскі падкрэсліў, што ў выпадку калі будуць вызваленыя палітвязні, неабходна будзе забяспечыць іх неабходнай падтрымкай:
«Вельмі важна будзе забяспечыць бяспечны прытулак для 1300 палітвязняў і іх сем’яў. Гэта лепшыя людзі Беларусі — мужчыны і жанчыны, якія стаялі за свабоду. Яны заслугоўваюць увагі і падтрымкі Еўропы цяпер як ніколі. Ім патрэбная рэабілітацыя, юрыдычны статус і шанец на новы пачатак».
Сустрэча ў Капенгагене паказала адзінства Еўропы ў пытанні Беларусі.
Ціханоўская завяршыла свой выступ словамі:
«Мы ўсе тут — каманда «Еўропа». Магчыма, Беларусь цяпер яшчэ на лаве запасных. Але мы — частка гэтай каманды. Не спяшайцеся нас спісваць. Сам факт, што мы тут сёння, — гэта знак: Беларусь належыць да Еўропы».
