У Офісе Канцлера Аўстрыі Святлана Ціханоўская сустрэлася з міністаркай па справах Еўропы Клаўдзіяй Плакольм.
Ціханоўская падзякавала Аўстрыі за прынцыповую пазіцыю ў структурах Еўрапейскага саюза. Яна адзначыла, што апошнія вызваленні палітвязняў — гэта вынік супольных намаганняў ЗША і ЕС. Але, падкрэсліла яна, у турмах застаюцца больш за 1300 палітвязняў, і вызваленне ўсіх іх павінна стаць агульнай мэтай для Беларусі і Еўрасаюза.
Падчас сустрэчы абмяркоўваліся шляхі, як зрабіць Беларусь пастаяннай тэмай на парадку дня Еўрапейскага саюза. Ціханоўская падкрэсліла, што беларусы хацелі б бачыць Еўрасаюз больш актыўным у пытаннях будучыні краіны. У 2023 годзе беларускія дэмакратычныя сілы прынялі Дэкларацыю аб будучым сяброўстве Беларусі ў ЕС. Цяпер вядзецца праца над дарожнай картай інтэграцыі Беларусі ў еўрапейскую прастору пасля дэмакратычных пераменаў, а таксама над праектамі рэформаў.
Абмеркавалі таксама магчымасць уключэння Беларусі ў еўрапейскія і аўстрыйскія праграмы падтрымкі для медыя, культурніцкіх ініцыятываў і моладзі. Ціханоўская адзначыла, што патрэбна больш адукацыйных праектаў, стыпендыяў, стажыровак і абменаў, каб беларусы маглі падарожнічаць і атрымліваць еўрапейскую адукацыю і неабходны досвед. Гаварылі пра запуск стыпендыяў для беларусаў у аўстрыйскіх універсітэтах, а таксама арганізацыю культурніцкіх мерапрыемстваў.
«Аўстрыя заўсёды была моцным голасам за Беларусь у Еўрапейскім саюзе. І мы разлічваем, што гэтая падтрымка будзе толькі мацнець. З вашай дапамогай беларусы змогуць дамагчыся пераменаў, спыніць рэпрэсіі і вярнуцца ў Еўропу ўжо як вольная і дэмакратычная нацыя», — заявіла яна.
