Відэазварот Святланы Ціханоўскай можна паглядзець па спасылцы.
- Тэкст звароту:
«Дарагія сябры,
У мінулым годзе мне выпаў вялікі гонар – атрымаць прэмію Карла Вялікага ад імя ўсіх беларусаў, якія хочуць мірнага і свабоднага жыцця. Я вельмі радая, што сёлета прэмія Карла Вялікага прысуджаецца Прэзідэнту Уладзіміру Зяленскаму і народу Украіны.
Прэзідэнт Зяленскі праявіў выключную адвагу і сваім прыкладам паказаў, што такое сапраўднае лідарства. Бясстрашна і красамоўна гаворачы ад імя ўкраінцаў, ён стаў натхняльнікам не толькі для свайго народа. Ён стаў голасам усяго свету.
Ён узначаліў сваю краіну ў надзвычай цяжкі для яе час, і ўсяго толькі некалькімі словамі – «Я тут» – ён падняў сваю нацыю на барацьбу з агрэсарам.
Нягледзячы на неспасціжныя выпрабаванні, народ Украіны працягвае абараняць сваю свабоду і права вырашаць уласную будучыню. У Беларусі мы таксама змагаемся за сваю свабоду і права на існаванне як нацыі.
Нас аб'ядноўвае барацьба дэмакратыяй супраць тыраніі, будучыні супраць мінулага. Украінцы і беларусы дакладна заявілі, што выбіраюць свабоду.
Няма сумневаў, што мы павінны перамагчы. Калі мы прайграем, Еўропа зноў апынецца ў цемры.
Тысячы беларусаў змагаюцца на баку Украіны. За нашую і вашую свабоду. Як я сказала ў сваёй прамове ў Аахене летась, гісторыя і будучыня павінны належаць нам, свабодным людзям Еўропы.
Мае шчырыя віншаванні Прэзідэнту Зяленскаму і народу Украіны з прысуджэннем прэміі Карла Вялікага. Давайце разам выганім дыктатараў у мінулае і дружна пабудуем агульную будучыню.
Дзякуй».
