Па розных ацэнках, пасля 2020 года больш за паўмільёна чалавек пакінулі Беларусь. Для многіх, хто застаецца ў краіне, кожны дзень звязаны з рызыкай быць затрыманым і асуджаным за лайк ці рэпост. Калі вы сутыкнуліся з рэпрэсіямі і адчуваеце неабходнасць пакінуць краіну, ведайце, што вы не самотныя. Звяжыцеся з праваабарончымі арганізацыямі і паведаміце ім аб існуючай сітуацыі. Мы сабралі партнёрскія ініцыятывы Офіса Святланы Ціханоўскай, якія могуць вам дапамагчы.
BYSOL садзейнічае тэрміновай эвакуацыі з Беларусі ў іншыя краіны, а таксама дапамагае ў легалізацыі (атрыманні ВНЖ) у Літве. Bysol можа забяспечыць неабходную падтрымку на ўсіх этапах пераезду.
Вы можаце таксама звярнуцца ў фонд «Краіна для жыцця». Эксперты прапануюць садзейнічанне ў эвакуацыі з Беларусі, кансультацыі юрыстаў і псіхалагічную дапамогу.
Фонд «Razam» таксама аказвае дапамогу і падтрымку беларусам, якія вымушана пакінулі краіну і апынуліся ў Літве. Вам дапамогуць у легалізацыі і атрыманні дакументаў, пракансультуюць па працаўладкаванні і акажуць іншыя віды дапамогі. Адзін з напрамкаў Фонду – захаванне беларускай ідэнтычнасці і культурнай спадчыны. У тэлеграм-канале Фонду публікуецца актуальныя даныя аб мерапрыемствах, у тым ліку курсах замежных моў. Інфармацыя аб усіх актыўнасцях фонду даступна па спасылцы.
Па легалізацыі і па іншых пытаннях, звязаных са знаходжаннем у Польшчы, інфармацыю можна ўдакладніць у Цэнтры беларускай салідарнасці ў Варшаве. Тут даюць усю неабходную інфармацыю і падтрымку. Аддзел прававой дапамогі Цэнтра дапамог многім беларусам, якія сутыкнуліся з юрыдычнымі цяжкасцямі.
У Беларускім доме ў Варшаве эксперты дапамагаюць кансультацыямі юрыстаў, аказваюць псіхалагічную дапамогу, ладзяць моўныя курсы. Актывісты падтрымліваюць рэпрэсаваных беларусаў і іх сем’і.
Таксама ў Польшчы арганізаваная інфалінія валанцёрскай ініцыятывы «Partyzanka». Канал ініцыятывы друкуе шмат актуальнай інфармацыі па прававых пытаннях, а таксама мае чат-бот для запытаў ад беларусаў.
Калі Вы сутыкнуліся з праблемамі ў Чэхіі, можаце звязацца з Офісам дэмакратычных сіл Беларусі ў Чэшскай Рэспубліцы па электроннай пошце: [email protected]. Вас пракансультуюць па міграцыйных пытаннях і нацыянальным заканадаўстве, дадуць інструкцыі, як дзейнічаць пры выяўленні праблемаў з дакументамі. Акрамя таго, вам дадуць кантакты чэшскіх партнёраў для эфектыўнага вырашэння складаных сітуацыяў.
У Германіі па дапамогу можна звярнуцца ў Асацыяцыю беларусаў «Razam e.V.» Гэтая ініцыятыва ў тым ліку ажыццяўляе дапамогу беларусам, якія пацярпелі ад рэпрэсіяў і знаходзяцца на тэрыторыі Германіі. Акрамя кансультацыяў па ўзніклых пытаннях, вам дапамогуць у камунікацыі з афіцыйнымі ўстановамі Германіі.
Калі вы сутыкнуліся з праблемамі ў краіне, дзе існуе Народная амбасада Беларусі, можна звярнуцца па дапамогу да прадстаўнікоў гэтай ініцыятывы. Звязацца з Народнымі пасольствамі – па электроннай пошце [email protected]. Імі ж у партнёрстве з Офісам Святланы Ціханоўскай і Аб’яднаным Пераходным Кабінетам падрыхтаваны сайт з інструкцыямі аб атрыманні праязнога дакумента замежнага грамадзяніна ў розных краінах.
Незалежна ад месцазнаходжання, вы можаце разлічваць на юрыдычную дапамогу Праваабарончага цэнтру «Вясна» калі з’яўляецеся ахвярай палітычна матываванага пераследу. З Цэнтрам можна звязацца праз афіцыйны чат-бот, пазначаны ў тэлеграм-канале.
Не забывайце, што вы не самотныя. Існуе мноства людзей і арганізацый, гатовых падтрымаць вас і дапамагчы знайсці шляхі вырашэння праблем, якія склаліся. Звяртайцеся па дапамогу, бо разам мы сіла!
