Святлана Ціханоўская правяла сустрэчу са спікеркай латвійскага Парламента Дайгай Мерыняй і сябрамі Парламенцкай групы падтрымкі дэмакратычнай Беларусі.
Ціханоўская распавяла спікерцы і дэпутатам пра хвалю ператрусаў у кватэрах прадстаўнікоў Каардынацыйнай Рады, Офіса, Аб’яднанага Пераходнага Кабінета, Народнага Антыкрызіснага Упраўлення, Народных амбасадаў у Беларусі. Ціханоўская звярнула ўвагу на тое, што гэта адбылося на фоне абвешчаных рэжымам «выбараў», якія з’яўляюцца імітацыяй і фарсам.
Парламенцкая група падтрымкі дэмакратычнай Беларусі займаецца пашырэннем латвійска-беларускага супрацоўніцтва, падтрымкай дэмакратычнай супольнасці і абаронай інтарэсаў беларусаў у Латвіі. Ціханоўская заклікала дэпутатаў разглядзець магчымасць прыняцця рэзалюцыі ў падтрымку Беларусі і працягваць браць апеку над палітвязнямі.
Ціханоўская распавяла пра праект новага беларускага пашпарта і папрасіла дэпутатаў падтрымаць ініцыятыву. Таксама абмеркавалі супрацоўніцтва ў межах Парламенцкай асамблеі Савета Еўропы, ПА АБСЕ, ПА НАТА і Балтыйскай Асамблеі.
Ціханоўская і Мерыня абмеркавалі праграму стажыровак у Парламенце Латвіі для маладых беларусаў. Спікерка прапанавала правесці ў будынку Парламента выставу, прысвечаную беларускім палітвязням. Таксама дэпутаты запрасілі Ціханоўскую наведаць Латгалію – памежны рэгіён Латвіі, дзе жыве шмат этнічных беларусаў – каб умацаваць сувязі з дыяспарай.
