Сёння стала вядома, што шэраг беларускіх праваабарончых арганізацыяў падрыхтавалі і перадалі інфармацыю аб злачынствах супраць чалавечнасці, учыненых беларускімі ўладамі. Доказы былі сабраны і абагульнены Народным антыкрызісным упраўленнем.
Дарадца Святланы Ціханоўскай па прававых пытаннях Леанід Марозаў пракаментаваў, чым гэта можа дапамагчы беларусам:
«Падача паведамлення ў Офіс пракурора Міжнароднага крымінальнага суда – гэта важны і лагічна неабходны крок на шляху да ўстанаўлення справядлівасці і прыцягнення да адказнасці вінаватых у злачынствах, якія здзяйсняюцца ў Беларусі.
Гэты дакумент падрабязна фіксуе дэпартацыю і прымусовае выгнанне сотняў тысячаў беларусаў (6,4% насельніцтва Беларусі па стане на 2020 год), а таксама рэпрэсіі, якія працягваюцца ў дачыненні да беларусаў за мяжой, уключаючы:
- завочны судовы пераслед;
- пагрозы сваякам;
- прапаганду нянавісці;
- сістэматычнае пазбаўленне доступу да асноўных дзяржаўных працэдураў – такіх як атрыманне дакументаў, якія сведчаць асобу.
Усё гэта – прыкметы скаардынаванай і маштабнай атакі на грамадзянскае насельніцтва, што падпадае пад кваліфікацыю злачынстваў супраць чалавечнасці згодна з Рымскім статутам, што адкрывае рэальную перспектыву пачатку афіцыйнага расследавання і выдачы міжнародных ордараў на арышт канкрэтных беларускіх службовых асобаў.
Мы дзякуем праваабарончай супольнасці і цвёрда ўпэўненыя, што гэтыя намаганні дадуць дакладнае ўяўленне пра грубыя і сістэматычныя парушэнні правоў чалавека з боку прадстаўнікоў рэжыму Лукашэнкі».
Фота: AP nuotr.
