Дарадца Святланы Ціханоўскай па моладзевай палітыцы і студэнцтву Маргарыта Ворыхава ўзяла ўдзел у пасяджэнні Кансультатыўнай Рады па моладзі Рады Еўропы ў Будапешце. Падчас івэнту беларуску абралі супрэзідэнткай Бюро – кіруючай структуры Рады па моладзі. Дарадца распавяла, чым гэта карысна для беларусаў і беларусак.
⚪️ Чаму гэта важна?
«Мы разумеем, што нашай краіне патрэбная дапамога міжнародных партнёраў. Але ў беларусаў і беларусак таксама ёсць экспертыза: не толькі па Беларусі, але і ў міжнародных колах. На гэтай пазіцыі ў нас ёсць магчымасць не толькі ўплываць на тое, якая дапамога аказваецца Беларусі, але і паказваць: нам ёсць, што аддаваць наўзамен».
🔴 Ці ёсць Беларусь у працоўных планах?
«Па сутнасці, Бюро займаецца напісаннем рэкамендацыяў і рэзалюцыяў. То-бок накіроўвае працу Рады Еўропы ў галіне моладзі ды іншых сферах, якія на яе ўплываюць. Напрыклад, у сферах экалогіі, штучнага інтэлекту, адукацыі, мабільнасці. Зараз ва ўсіх дакументах, якія пойдуць на ўзгадненне, дакладна будзе фігураваць Беларусь і становішча беларускай моладзі».
⚪️ Кантактная група Рады Еўропы па Беларусі працуе з моладдзю?
«На сустрэчы з кіраўніком Дэпартамента па справах моладзі Тобіасам Флессенкемперам мы абмеркавалі важнасць працы Кантактнай групы і ўсебаковай падтрымкі Беларусі. Рада Еўропы намераная працаваць у гэтым напрамку і зрабіць падтрымку больш устойлівай і доўганакіраванай. Нагадаю, што існуе план, па якому ідзе праца па Беларусі ўжо зараз. Вялікая яго частка – праца менавіта па моладзі».
