Візіт будзе доўжыцца з 31 жніўня па 3 верасня. Святлана Ціханоўская возьме ўдзел у Стратэгічным форуме ў горадзе Блед, каб узняць дзве важныя тэмы:
– як Беларусь можа ўдзельнічаць у праграме Усходняга партнёрства, раз рэжым самаўхіліўся з яе;
– як ЕС можа дапамагчы Беларусі.
На форуме таксама выступяць прэзідэнт Еўрапейскай Рады Шарль Мішэль, прэзідэнт Еўрапарламента Давід Сасолі, а таксама многія кіраўнікі дзяржаў і ўрадаў.
Таксама ў Ціханоўскай запланаваныя сустрэчы з прэм'ер-міністрам Славеніі Янезам Яншам, прэм'ер-міністрам Албаніі Эдзі Рамам, міністрам замежных спраў Румыніі Багданам Аўрэску і іншымі высокапастаўленымі чыноўнікамі.
У траўні 2021 года беларуская лідарка ўжо наведвала Славенію. Пасля перамоваў з Ціханоўскай Славенія пазбавіла статусу ганаровага консула Янеза Шкрабеца, які займаўся бізнесам з рэжымам і дапамагаў абыходзіць санкцыі. З 1 ліпеня Славенія старшынюе ў Еўрасаюзе, і ўвесь гэты час падтрымлівае тэму Беларусі ў ЕС.
